Nur-Sultan: «Unaidy» dámhanasy sertıfıkattaldy
Elorda turǵyndaryna keńinen tanylǵan «Unaidy» dámhanasy «QMDB halal» standarty boıynsha sertıfıkattaldy.
Qazaqstan musylmandary dinı basqarmasyna arnaıy kelgen Láıla Sultanqyzyna «Halal Damý» dırektory Aıbek Asqarbekuly ujym jumysy men sertıfıkattaý barysyn, standarttaý kezeńderin, halal tańbasynyń ózge adaldyqty anyqtaıtyn belgilerden ereksheligin túsindirdi.
«Halal – adaldyq pen tazalyqtyń tańbasy. Halal sertıfıkattaý jáne standarttaýmen tek dinı basqarma aınalysýy tıis. «Halal Damý» uıymy elimizdegi kúlli musylmandardyń adal as tutynýyna jaýapkershilik júgin arqalaǵan uıym. Qasıetti Ramazan aıynyń qarsańynda, barsha aýyz bekitken musylmandarǵa adal as usyný nıetimen «QMDB halal» standarty boıynsha sertıfıkattaýdan ótkenderińizge Alla razy bolsyn! Alla kásipterińizge bereke bersin! Ramazan aıynyń jaqsylyǵy men saýaby siz ben bizge bolǵaı!» – degen Aıbek Asqarbekuly «Unaidy» dámhanasynda aldaǵy ýaqytta mamandar tarapynan mindetti tekseris jumystary júrgiziletinin eskertti.
Láılá Sultanqyzy da óz kezeginde «Halal Damý» mamandaryna alǵysyn bildirip, ujym jumysyna sáttilik tiledi.
