Nur-Sultanda jańa meshittiń aınalasyna úlken saıabaq salynady (FOTO)
Nur-Sultanda jańa meshittiń aınalasyna úlken saıabaq salynbaq. Bul týraly qala ákimi Altaı Kólginov Instagram-daǵy paraqshasynda jazdy, – dep habarlaıdy Tengrinews.kz tilshisi.
Qazir atalǵan aýmaqty abattandyrý jumysy júrip jatyr. Altaı Kólginovtiń aıtýynsha, jańa qoǵamdyq keńistik qala turǵyndary men qonaqtarynyń taza aýada ýaqyt ótkizýi úshin qolaıly oryn bolady.
Saıabaq Máńgilik El, Qabanbaı batyr dańǵyldary men Saýran, Hýseın Ben Talal kósheleriniń boıynda ornalasady.
“Saıabaqtyń ortalyq alleıasynda uzyndyǵy 300 metr sýburqaq bolady, onyń ishinde shaǵyn arhıtektýralyq músinder, kóleńkeli shatyrlar ornalasady. Jyldan jylǵa bul aýmaqty kógaldandyramyz. Qalada ózindik “jasyl araldar” qurý óte mańyzdy. Sondaı-aq, óz tarapymyzdan ınjenerlik jeliler men kommýnıkatsııalardy tartý jumysyn júrgizemiz”, – dedi ákim.
Elorda ákimi bul meshit elimiz ben Ortalyq Azııadaǵy eń úlken meshit ekenin aıtty.
“Negizgi kúmbezdiń bıiktigi shamamen 90 metr, al munaralar 130 metr bıiktikke kóteriledi. Meshittiń syıymdylyǵy – 30 myń adam. Meshit Elbasy Nursultan Nazarbaevtyń tapsyrmasy boıynsha demeýshilik qarajat esebinen salynyp jatyr”, – dedi Kólginov.
