«Nureke» shujyǵy sertıfıkattaldy (FOTO)
Kópshilikke áleýmettik jelide «Nureke» saýda belgisimen tanylǵan Nurdáýlet Shertimniń shujyǵy «QMDB halal» standarty boıynsha sertıfıkattaldy.
Qazaqstan musylmandarynyń qara shańyraǵy – Dinı basqarmaǵa arnaıy kelgen óner ıesine sertıfıkatty "Halal Damý" dırektory Aıbek Asqarbekuly tabystady.
Nur-Sultan qalasynda ornalasqan «Iasmın» shujyq tsehynda shyǵarylatyn «Nureke», «Alsem», «Omad», «Aıanat» t.b shujyqtar «Halal ónimderdi óndirýge, óńdeýge, daıyndaýǵa, saqtaýǵa, tasymaldaýǵa, saqtaýǵa jáne satýǵa qoıylatyn jalpy talaptar standarty» boıynsha sertıfıkattaldy.
«Adaldyq júrgen jerde adamdyq júredi. Halyq senimin aqtaı otyryp, adal da taza, paıdaly ónim óndire otyryp kásip jasaý – ońaı emes. Qaltanyń emes, halyqtyń qamyn oılaǵan sizderdeı el azamttary bar kezde «halaldyń» týy jelbireıtini anyq. Bizdiń basty maqsatymyz – tutynýshylar seniminen shyǵyp, elge de, kásipkerlerge de paıdaly qyzmet etý. Osy jolda kásibińizdi halalmen toǵystyrǵanyńyzǵa Alla razy bolsyn! Aldaǵy ýaqytta mindetti baqylaý-qadaǵalaý sharalary oryndalyp, qajet bolsa, laborotorııalyq tekseris jumystary da júrgiziledi» degen Aıbek Asqarbekuly Nurdáýlet Shertimniń kásibine bereke tiledi.
Óz kezeginde, belgili ázilkesh ári óner ıesi Nurdáýlet Shertim «Halal Damý» ujymyna alǵysyn bildirip, Allanyń amanatyn adal atqaratynyna ýáde berdi. Esterińizge sala keteık, qazirgi tańda ınstagram jelisinde keńinen taraǵan «Seka nıam-nıam», «Aıdyń nury et», «Meırjachnaıa», «TerriTima» sekildi tanymal blogerler men vaınerlerdiń shujyqtary «QMDB halal» standarty boıynsha sertıfıkattalǵan. Atalǵan shujyqtar «Halal Damý» baqylaýyndaǵy shujyq tsehtarynda óndiriledi.
