Óskemen sapary: Qorytyndysy men nátıjesi (FOTO)

Bas múftı Naýryzbaı qajy Taǵanulynyń Shyǵys Qazaqstan oblysyna jasaǵan saparynyń qorytyndysy men nátıjesin nazarlaryńyzǵa usynamyz.

QMDB Tóraǵasy Óskemen qalasynda ótken Ǵulamalar keńesine qatysyp, elimizge tanymyl ǵalymdar keńes quramyna qabyldanǵanyn málimdedi. «Belgili ǵalymdarymyz – Tóráli Qydyrdy, Yqtııar Paltóreni, Rashıd Muhıtdınovty Ǵulamalar keńesine múshelikke qabyldaý týraly sheshim qabyldadym. Bul sheshim keńes jumysyna serpin beredi degen senimdemin. Óz salasynyń maıtalman ǵalymdary pátýalardy bekitý, akademııalyq kitaptar shyǵarý syndy aǵartý baǵytyndaǵy jumystarymyzdy ilgeriletýge úles qosady degen úmittemin» dedi Naýryzbaı qajy Taǵanuly.

Ǵulamalar keńesinde elimizde tuńǵysh ret Islam Entsıklopedııasy men dinı orfografııalyq sózdik shyǵarý týraly sheshim qabyldandy. 10 pátýanyń mátini qaralyp, bekitildi. Qabyldanǵan pátýalardyń tolyq mátini jýyrda jarııalanbaq.

Bas múftı Naýryzbaı qajy Taǵanuly Shyǵys Qazaqstan oblysynyń ákimi Danıal Ahmetovpen kezdesti. Kezdesýde óńirdegi dinı ahýal talqylanyp, ımamdardy áleýmettik qoldaýdyń mańyzy sóz boldy. Oblys ákimi Bas múftıdiń usynysyna qoldaý bildirip, ımamdardy jalaqymen qamtamasyz etýge ýáde berdi.

Óskemen qalasyndaǵy «Halıfa Altaı» meshitinde óńir ımamdarymen kezdesken Bas múftı din qyzmetkerlerin belsendi jumys isteýge shaqyryp: «Qazaqstan musylmandary dinı basqarmasy kúndelikti qyzmet barysynda jeti baǵytqa basymdyq berip keledi. Atap aıtqanda, aqparat jáne qoǵammen baılanys, ýaǵyz-nasıhat, qaıyrymdylyq, oqý-aǵartý jáne kadrlyq áleýet, rýhanı tárbıe, ıhsan ilimi, din men dástúr, jat dinı aǵymdarmen jumys boıynsha belsendi qyzmet etýge shaqyramyn. Eń bastysy asyl dinimizdiń qundylyqtaryn nasıhattap, halyqtyń rýhanı suranysyn qanaǵattandyrýymyz qajet» dedi.

Óskemen qalasyndaǵy «Halıfa Altaı» meshitinde «Shyǵys medıa» ortalyǵynyń ashylý rásimine qatysqan QMDB Tóraǵasy stýdııa qyzmetkerlerin «Halyq arna» Efırin sapaly ónimmen toltyrýǵa atsalysyp, belsendi qyzmet kórsetýge úndedi.

Bas múftı sapar barysynda meshit janynan ashylǵan «Zere ana» ortalyǵy jumysymen tanysty. QMDB Áıel-qyzdar sektorynyń Óskemen aımaǵyndaǵy ókildiginiń bastamasymen jabdyqtalǵan bul ortalyqta ana men balanyń paıdaly ispen aınalysýyna, bilim jetildirýine, túrli qolóner buıymdaryn jasaýyna barlyq jaǵdaı qarastyrylyǵan.

«Ár zamannyń óz jaǵdaıyna qatysty azamattarǵa júkteler mindet men jaýapkershik bolady. Búgingi jastarǵa júkteler jaýapkershilik – tereń bilim alyp, el ıgiligi úshin qyzmet etý, shańyraq kóterip, izgi urpaq tárbıeleý. Sizder osy amanatty abyroımen atqarsańyzdar, elimiz órkendeı túsedi. Halyqqa qyzmet etýden asqan ǵazız nárse joq. Ol úshin jaqsy bilim alyp, óz salańyzdyń maıtalman mamany bolýlaryńyz kerek. Alla Taǵala bilim jolyndaǵy qadamdaryńyzǵa jar bolsyn». Amanjolov atyndaǵy Shyǵys Qazaqstan ýnıversıteti men meshit shákirtterimen kezdesken Bas múftı jastarǵa osyndaı nasıhatyn jetkizdi.

Óskemen qalasyndaǵy A.S.Pýshkın atyndaǵy Shyǵys Qazaqstan oblystyq kitaphanasynda jýyrda ǵana Bas múftı bastamasymen shyqqan «Tápsirlerdiń tańdaýlysy» kitabynyń tanytymy ótti. Sonymen qatar Ǵulamalar keńesinde «Ǵıbadat tutqasy» kitabynyń tusaýkeser rásimi ótti.

QMDB Tóraǵasy «Zeket jáne qaıyrymdylyq» qorynyń «El úlesi – páterge» qaıyrymdylyq jobasy aıasynda 423-inshi páter kiltin aýyl ımamyna tabystady. Bul jolǵy páter Shyǵys Qazaqstan oblysy Kókpekti aýdany Úlgilimalshy aýylynyń ımamy Álimbek Bataıǵa buıyrdy.

Bas múftı sapar aıasynda D.Serikbaev atyndaǵy Shyǵys Qazaqstan tehnıkalyq ýnıversıtetinde ótken Aqsaqaldar forýmyna qatysyp, zııaly qaýym ókilderimen din men dástúr sabaqtastyǵy jaıly suhbattasty.

Tarbaǵataı aýdany Aqjar eldimekeninde boı kótergen qaıyrymdylyq mekemesiniń ashylýyna qatysqan Bas múftı: «Halqymyz «Aýylyna qarap azamatyn tany» deıdi. Osy aýyldan shyqqan azamattar bizdiń ıgi bastamamyzdy qoldaý bildirip, qaıyrymdylyq mekemesiniń ashylýyna úles qosty. Osy sátti paıdalanyp, ózimniń jáne Qazaqstan musylmandary dinı basqarmasy ujymy atynan aıryqsha alǵysymdy jetkizemin. Alla razy bolsyn!» dedi.

Saltanatty jıynda Bas múftı qaıyrymdylyq mekemesi ǵımaratynyń qurylysyn júrgizgen Erbolat Doldabaevqa aıryqsha alǵys aıtyp, umra qajylyǵyna joldama berdi. Aqjar aýylynyń azamaty, búginde Almatydaǵy Nur-Múbarak ýnıversıtetinde tálim alyp jatqan Rınat Nazarbekovke bilim grantyn tabystady. Aqjar eldimekenindegi «Baıjigit baba» meshitiniń naıb ımamy, belsendi jas din qyzmetkeri Musa Jálelge 424-inshi páter kiltin berdi.

Bas múftı Shyǵys Qazaqstan oblysy Ulan aýdany Qasym Qaısenov kentinde ornalasqan «Musa baba» meshit ǵımaraty qujatyn resmı túrde qabyldap aldy.

QMDB Tóraǵasy Óskemen qalasynda salynyp jatqan zamanaýı jańa meshittiń qurylys jobasymen tanysty. Meshit jobasymen Óskemen qalasynyń ákimi Jaqsylyq Omar tanystyrdy.

Sapar kezinde Bas múftı oblystyq «Halıfa Altaı» meshiti janynan ashylǵan «Islam mádenıeti» murajaıyn aralady. Murajaıda Kúltegin eskertkishiniń kóshirmesi, Túrkistandaǵy áıgili Taıqazannyń kóshirmesi, qazaqtyń alty qanat kıiz úıi men Arystanbab, Qoja Ahmet Iasaýı keseneleriniń shaǵyn maketteri qoıylǵan.

Naýryzbaı qajy Taǵanuly Shyǵys Qazaqstan oblysyna jasaǵan resmı sapary kezinde Óskemen jáne Semeı qalalaryn jalǵaıtyn jol boıyndaǵy meshittegi jolaýshylar bólmesine aıaldady. Sýyq bulaq kentinde ornalasqan meshitke toqtaǵan QMDB delegatsııasy jolaýshylar bólmesinde bolyp, qulshylyq úıinde atqarylǵan jumystarmen tanysty. Jınalys barysynda Bas múftı aýyl ımamyna birqatar tapsyrmalar berdi.