Óskemende «Tápsirlerdiń tańdaýlysy» kitabynyń tanytymy ótti (FOTO)
Búgin Óskemen qalasyndaǵy A.S.Pýshkın atyndaǵy Shyǵys Qazaqstan oblystyq kitaphanasynda jýyrda ǵana Bas múftı bastamasymen shyqqan «Tápsirlerdiń tańdaýlysy» kitabynyń tanytymy ótti.
Jergilikti zııaly qaýym ókilderimen, aqyn-jazýshylarmen júzdesken Bas múftı Naýryzbaı qajy Taǵanuly: «Allaǵa shúkir, Qazaqstan musylmandary dinı basqarmasynyń aǵartý salasyndaǵy jumysy jandanyp keledi. Biz Dinı basqarma janynan Baspa jáne aýdarma bólimin ashyp, halyqqa paıdaly eńbekterdi shyǵara bastadyq. Alla jazsa, osy jyly 14 kitap jaryq kóredi. Jastarymyz Quran aıattaryn durys túsinsin degen nıetpen «Tápsirlerdiń tańdaýlysy» kitabyn shyǵardyq. Bul eńbek qarapaıym ári túsinikti tilimen jazyldy. Jalpy oqyrman qaýymǵa paıdaly bolady degen senimdemin» dedi.
Basqosý barysynda zııaly qaýym ókilderi ózderin tolǵandyrǵan máseleler jaıly pikirimen bólisti.
Bas múftı ıgi kezdesý kezinde kitap kórmesin tamashalap, kitaphana ujymynyń jumysymen tanysty. Basqosýdan keıin Naýryzbaı qajy Taǵanuly 4 tomdyq «Tápsirlerdiń tańdaýlysy» kitabyn kitaphanaǵa resmı túrde tabystady.
