Óskemende «Jas tolqyn: Dala semınary» bastaldy (FOTO)

Elbasymyzdyń bastamasymen jarııalanǵan «Jastar jylynda» QMDB-nyń Óskemen aımaǵy ókildiginiń uıymdastyrýymen Shyǵys Qazaqstan oblysynda «Jas tolqyn: Dala semınary» jobasy óz jumysyn bastady.

Ókildikten Altaı aýdany Kúmisbulaq ólkesine onshaqty kıiz úı tigilip, sporttyq alańqaı jasalyp, ár oblystardan kelgen jastarǵa barlyq jaǵdaı jasaldy. Qazirgi tańda «Dala semınary» jobasyna elimizdiń ár oblysynan, QMDB ókildikterinen jınalǵan 80-ge tarta jas qatysyp jatyr. Olar 3-4 mezgil as-sýmen, jatar orynmen qamtylǵan. Sharanyń sátti ótýine ókildik tarapynan erekshe nazar aýdarylyp, óńirge qarasty aýdan, qala meshitteri túgel jumyldyryldy.

«Dala semınary» barysynda jastarǵa jat aǵymdarǵa qarsy kúres, ulttyq qundylyqtardy nasıhattaý týrasynda semınar-trenıngter uıymdastyrylyp jatyr. Sonymen qatar qoǵam qaıratkerlerimen kezdesýler ótkizý de josparlanǵan.

Semınar týraly QMDB Óskemen aımaǵynyń ókil ımamy Ermek Qasbolatuly: «Tabıǵat asyndaǵy bul shara jastardyń erekshe qyzyǵýshylyǵyn týǵyzdy. Elbasymyzdyń bastamasymen jarııalanǵan «Jastar jylynda» jastardy qamtyǵan rýhanı-tanymdyq sharalar ótkizý arqyly jat aǵymdardan saqtaný, ulttyq qundylyqtary dáripteý qazirgi tańdaǵy ózekti másele ekendigi aıan. Sondyqtan ókildikten aıyryqsha formattaǵy osy sharany uıymdastyryp otyrmyz. Jastar taza aýada demalýymen qatar bir birimen tanysyp, birligin arttyryp, tájirıbe almasady»,- dedi.

Bul ıgi bastama óz kezeginde QMDB Jastar isi bólimderiniń ózara tájirıbe almasýyna da erekshe áserin tıgizeri anyq.

Elimizde alǵash ret qolǵa alynyp otyrǵan «Jas tolqyn: Dala semınaryna» jastar aıyryqsha belsendilikpen qatysyp, jańa ıdeıalaryn ortaǵa salyp, taza aýa, tabıǵat aıasynda bas qosyp, máseleler talqylap qana qoımaı, ónermen sporttan saıysqa túsýde.

Aldaǵy kúnderi jastar oblystaǵy mańyzdy tarıhı oryndary aralaıdy dep kútilýde.