Ótken kúnge ókpe joq, keler kúnnen úmit kóp

Biz – ótkenge salaýat aıtyp, Allanyń araılap atqan árbir tańynan jaqsylyq kútken halyqpyz. Rýhymyzdy túsirmeı, syn saǵatynda saǵymyzdy syndyryp almaýǵa tyrysqan joraly jurtpyz. Allaǵa shúkir, osyndaı ıgi nıet pen birliktiń arqasynda talaı náýbetti kezeńnen aman shyǵyp, qıyndyqty eńserip kelemiz.

2020 jyl halqymyz úshin syndarly kezeń boldy. Alaıda biz bul synaqtan kóp sabaq aldyq. Aýyr jyl bolǵanmen, aýqymdy ister atqaryldy. El basyna kún týǵanda halqymyz qaıyrymdylyq isinde bir úıdiń balasyndaı birigip, eldigimiz ben erligimizdi kórsettik. Jaq­sy isterde judyryqtaı ju­my­lyp, aınalamyzǵa meıirim-sha­pa­ǵatymyzdy tóktik.

Biz – ótken kúnge ókpe joq, keler kúnnen úmit kóp degen tá­lim­di sózdi ómirlik ustanym etken ultpyz. Rasynda, adam balasy úmitpen tynystaıdy. Úmitpen alǵa jyljıdy. Alla Taǵalaǵa shynaıy túrde ıman keltirip, keleshekke senimmen qaraý – úmit etýdiń negizgi shart­tarynyń biri.

Jaratýshy Jabbar Iemiz qasıetti Qurannyń «Zúmar» súresiniń 53-aıatynda: «Ýa, shekten tys kúná jasap, ózderine zııan keltirgen quldarym! Alla­nyń raqymynan úmitterińdi úz­beń­­der. Alla kúnálardyń bar­­ly­­ǵyn keshiredi. Óıtkeni Ol kú­mánsiz jarylqaýshy jáne óte me­ıirimdi» dep baıandaǵan. Biz bul aıattan Alla Taǵalanyń asa Raqymdy, asa Meıirimdi ekenin uǵamyz.

Biz eń áýeli Alla týraly jaq­sy oıda bolýymyz kerek. Ar­daqty Paıǵambarymyz Muham­medtiń (oǵan Allanyń salaýaty men sálemi bolsyn): «Alla týraly jaqsy oılamastan aralaryńnan eshkim o dúnıege attanbasyn» degen hadısinde kóp maǵyna jatyr.

Óziniń shynaıy taqýa­ly­ǵymen, dindarlyǵymen aty shyq­qan ǵalym Ábý Sáhildiń erekshe nyǵmetke bólengenin kórgen adamdar munyń mánisin suraǵan eken. Sonda ǵalym: «Rabbym jaıly jaqsy pikirde bolǵannyń jemisi» dep jaýap bergen eken.

Ǵalym ıbn ál-Ýazır: «Al­lanyń meıirimin tileý – pende úshin úmit esigin ashady. Oǵan taǵattana qulshylyq etýge kúsh beredi. Nápil amaldardy oryndaýǵa qýat berip, izgi amaldardy jarysa jasaýǵa jiger syılaıdy» degen.

Musylman adam kúndelikti tir­­shiliginde, qulshylyǵynda, ­qo­ǵam men otbasy aldynda jaq­­sylyqtyń jarshysy bo­la bilýi tıis. Jaqsy isinen jaq­sylyqty úmit etýi kerek. Pende kúndelikti isinen «túk shyqpaıdy, jalyqtym» dep bolymsyz pıǵylda bolsa, ómirden de jalyǵyp ketedi eken. Alla odan saqtasyn! Al kelesheginen jaqsylyq kútse, shynynda da jaqsylyqqa qol jetkizedi.

Áıgili Imam Shafıǵı: «Jú­regim qataıyp, jolda­rym­nyń astań-kesteńi shyq­qan kezde úmi­timdi Seniń keshirimińe bas­pal­daq etip tósedim. Kúná­la­rym kóz aldymda qansha ulǵaı­ǵanmen, Seniń keshirimińniń qasynda túkke turmaıtynyn bildim, Se­niń keshirimińniń kóz jetpes keń ekenin kórdim» dep Alla Ta­ǵa­la­nyń erekshe raqymyna úmit artqanyn aıtqan.

Úmit – berekeniń, tynysh­tyqtyń kilti. Alla Taǵala adam balasyna ómirden kúder úzbeı ǵumyr keshýi úshin kóptegen nyǵmet bergen. Onyń bizge bergen nyǵmetteriniń shegi joq. Baýyrjan Momyshulynyń: «Úmit órge tartady, úmitsizdik kór­ge tartady» degen sózi oıǵa qa­nat bitiredi.

Búgingi tańda túrli synaqqa dýshar bolyp, ómirdiń túrli taýqymetin keship otyrǵan jan­dar­ǵa úmit syılaý, ómirge degen qulshynysyn arttyrý, olardyń jany men tánine em bolar amal jasaý – saýaby mol is.

Imam Shafıǵı: «Qoǵamǵa eki túrli sanattaǵy adamdar qajet: birinshisi – dindi saq­taı­tyn ǵalymdar, ekinshisi – densaýlyqty saqtaıtyn dári­gerler» degen eken. Osy rette synaq sátinde adam jany men tánine shıpa izdegen din qyz­metkerleri men dárigerlerge aıryq­sha alǵys aıtamyz.

Alla Taǵala elimizge aman­dyq, jurtymyzǵa tynysh­tyq bersin. Jańa jylǵa josparlaǵan maqsat-murattarymyz oryndalsyn. Jaratýshy Jabbar Iemiz jer betinen juqpaly indetti joıyp, jaqsy kúnderde jolyǵýdy násip etkeı. Ámın!

Naýryzbaı qajy TAǴANULY
Qazaqstan musylmandary dinı basqarmasynyń tóraǵasy, Bas múftı