Ózbekstan men qazaqstan birlesken týr uıymdastyrmaq (FOTO)
Aldaǵy ýaqytta týrısterge arnalǵan arnaıy baǵdarlama jasalady. Sonyń arqasynda eki el arasynda transporttyq dáliz jasalyp, týrıster Ózbekstan men Qazaqstan aýmaǵynda erkin kirip, eki eldiń rýhanı oryndaryn tamashalaı alady.
Atalǵan transporttyq dáliz eki eldegi, atap aıtqanda Qazaqstannyń Túrkistan oblysyndaǵy Arystan bab, Ahmet Iassaýı, Hákim Ata jáne Ózbekstannyń Tashkent oblysyndaǵy Zeńgi Ata kesenelerin zııarat etýge múmkindik beredi. Osyǵan oraı búgin Ózbekstannyń Qazaqstandaǵy elshiligi jáne Ózbekstannyń Naýaı oblystyq ákimshiliginiń uıymdastyrýymen eki eldiń týrızmge jaýapty mekemeleri qatysýymen aqparattyq tanystyrý jumystary bastaldy.
Qazaqstannan aıtýly sharaǵa Mádenıet jáne sport mınıstrligi Týrızm ındýstrııasy komıtetiniń, «Kazakh Tourizm» AQ ulttyq kompanııasynyń, elimizdegi basqa týrıstik operatorlardyń ókilderi qatysty. QMDB atynan jıynǵa Qajylyq bóliminiń meńgerýshisi Jándillá Bekjigitov pen «Tawaf Travel» qajylyq kompanııasynyń dırektory Bektemir Iskakov qatysty.
«Qazirgi tańda Ózbekstan ishki týrızmge, sonyń ishinde zııaratqa mán berip jatyr. Zııarat jasaýdyń sharıǵatqa saı durys úlgisin qalyptastyrýǵa kúsh salýda. Bul baǵytta Qazaqstannyń da alǵa qoıǵan maqsaty bar. Sondyqtan eki el bul baǵytta birigip jumys isteýdi qolǵa almaq. Bul óz kezeginde eki eldiń týrıstik múmkindigin arttyrý úshin qajet. Ózbekstanmen bizdiń ortaq dúnıelerimiz kóp. Alaıda ol úshin zııarattyń durys jasaýyn birigip qalyptastyrý qajet. Basyp ótken izimizden ǵıbrat almaı bolashaǵymyz bulyńǵyr bolady. Bul shara osy olqylyqty toltyrý maqsatynda atqarylyp jatyr» deıdi Jándillá Bekjigitov.
Sondaı-aq sapar barysynda QMDB ókilderi Ózbekstannyń naıb mýftıimen jáne Ózbekstan múftııatynyń «Mýslım» týrıstik kompanııasynyń ókilderimen kezdesti. Kezdesýde eki el arasyndaǵy zııarat máselesin damytý, elaralyq rýhanı yntymaqtastyqty arttyrý máseleleri sóz boldy.
