Ózbekstandyq áriptestermen tájirıbe almasty (FOTO)
Ózbekstanǵa arnaıy issaparmen kelgen «Halal Damý» dırektory Aıbek Asqarbekuly Ózbekstan musylmandary dinı basqarmasynyń Halyqaralyq baılanystar jáne halal standart bóliminiń basshysy Mýhammad-Akmolhan Shakırovpen kezdesip, tájirıbe almasty.
Jıynǵa «Halal Damýdyń» bas tehnology Aıjan Omarova men Ózbekstandaǵy halal salasynda qyzmet etetin mamandar qatysty. Basqosýda kúlli musylmanǵa ortaq halal máselesin halyqqa nasıhattaý, álemdik naryqta básekege qabiletti halal ónim óndirýshi kásiporyndar sanyn arttyrý, eki eldiń halal standarttaý jáne sertıfıkattaý júıesinde ózara tájirıbe almasý, mamandardy oqytý, bilimin jetildirý, tutynýshylar arasynda «halal» tańbasyna degen senimdilikti qalyptastyrý t.b. máseleler talqylandy.
«Ózbekstan – Qazaqstannyń Ortalyq Azııadaǵy týystas ári dindes baýyry. Qazaq-ózbek – baǵzy zamannan baýyrlas el. Bizdi biriktiretin qundylyqtar kóp. Bizdiń halqymyzda «Kórshini Qudaı qosady, dosty tańdaısyń» degen sóz bar. Bizdi ortaq tarıhı taǵdyrymyz, týystas tilimiz, dinimiz ben mádenı qundylyqtarymyz biriktiredi. Allanyń bekitken halal asyn halyqqa nasıhattaý, halal ındýstrııasy salasy boıynsha birlesken jobalardy júzege asyrý syndy ortaq kelisimderdi jandandyrý» dep atap ótti Aıbek Asqarbekuly.
Sonymen qatar ÓMDB Halyqaralyq baılanystar jáne halal standart bóliminiń basshysy qazaqstandyq tarapqa ekijaqty baılanystardyń nyǵaıýyna járdemdesip, kásiporyndar jumysyn jandandyryp, halyqqa halal ónim usynýǵa atsalysqany úshin «Halal Damýǵa» mekemesine rızashylyǵyn bildirip, batasyn berdi.
