Ózbekstannyń Namangan qalasynan tabylǵan Qoja Ahmet Iasaýıdiń móri qazaqshaǵa aýdaryldy (FOTO)
Ózbekstannyń Namangan qalasynan tabylǵan Qoja Ahmet Iasaýıdiń móri qazaqshaǵa aýdaryldy. Bul týraly Túrkistandaǵy «Áziret Sultan» memlekettik tarıhı-mádenı qoryq-mýzeıiniń mamandary málimdedi, dep habarlaıdy QazAqparat tilshisi.
Atalǵan mýzeıdiń ǵylym bóliminiń basshysy Berik Baıbolovtyń aıtýynsha, aýdarma kezinde metalldan jasalǵan mórde tyń derekter jazylǵany anyqtalǵan. Mamandardyń sózinshe, buǵan deıin tabylǵan Qoja Ahmet Iasaýıdiń mórleri tek qaǵaz kúıinde saqtalǵan. Al, bul mór mystan jasalǵan. Shaǵataı tilinde jazylǵan jazbalar aýdarylyp, qaı ǵasyrǵa tıesili ekeni de anyq bolǵan.
«Mundaı mór jalpy aıtqanda Orta Azııada eshkimde kezdespeıdi. Osy Ibrahım aqsaqaldyń qolynda qazir saqtalyp turǵan eken. Bizdiń túrkistandyq saqtalǵan mórlerde on Ahmettiń aty jazylady da, al keshegi qarııanyń qolynan tabylǵan mórdi biz qazir aýdardyq. Onda bizge beımálim úsh sheıhtyń aty belgili boldy. Ol Ahmet Ysqaq, Ahmet Jarjanı, Ahmet Marjanı degen. 14-15 ǵasyrǵa tıesili eken aıdan anyq»,- deıdi Berik Baıbolov.
Aıta keteıik, buǵan deıin Ózbekstannyń Namangan qalasynan Qoja Ahmet Iasaýı shejiresiniń bir nusqasy men móri tabylǵan bolatyn. Islam álemine áıgili sheıhtardyń esimi jazylǵany qundy muralardy Iasaýıdiń urpaǵy Ibrahımjan Sharıfhýjaev qajy saqtap kelgen. 98 jastaǵy qarııany Túrkistandaǵy «Áziret Sultan» memlekettik taıhı-mádenı qoryq-mýzeıiniń qyzmetkerleri Ózbekstanǵa arnaıy izdep bardy. Jasy bir ǵasyrǵa taıaǵan aqsaqal mýzeı qyzmetkerlerine ata-babalarynan jetken Nasabnama qoljazbasyn da kórsetti. Shaǵataı tilinde jazylǵan eki jarym metrlik qoljazbany da mamandar sýretke túsirip alyp, aldaǵy ýaqytta zerttemek.
Al, ǵulama ǵalym Ibrahımjan aqsaqaldyń qolyndaǵy Nasabnama shejiresi men mórin jaz maýsymyna taıaý Túrkistandaǵy murajaıǵa tabystamaq. Jalpy, mýzeı basshylyǵy Qoja Ahmet Iasaýıdiń qaldyrǵan murasy áli kúnge tolyq zerttelip bitpegenin aıtady. Ázirge tek 70-ten asa shejiresiniń túri tabylǵan. Sondyqtan «Iasaýı izimen» ǵylymı tanymdyq Ekspedıtsııa aıasynda áli de jumystar Orta Azııa elderi aýmaǵynda jalǵasady dep otyr. Osyǵan deıin Namangannan Qoja Ahmet Iasaýı shejiresiniń bir úlgisi men móri tabylǵanyn jazǵan edik.
