Pavlodarlyq 250 otbasyǵa azyq-túlik alýǵa sertıfıkattar berildi
Qyzyl Jarty aı qoǵamy men onyń demeýshileriniń pavlodarlyq otbasylarǵa kórsetken aqshalaı kómektiń somasy 3 750 000 teńgeni qurady, dep habarlaıdy «QazAqparat HAA tilshisi.
«Biz jasaǵan kómek alýshylar tizimi qazirgi tańda Qyzyl Jarty aı qoǵamynyń bazasyna engizilgen az qamtylǵan jáne kópbalaly otbasylardan, jalǵyzbasty analardan, jalǵyz turatyn zeınetkerlerden turady. Qoǵamnyń Pavlodar oblystyq fılıaly qıyn jaǵdaıda qalǵan 250 otbasyny qamtıdy», - dedi QR Qyzyl Jarty aı qoǵamynyń Pavlodar oblystyq fılıalynyń basshysy Gúlnár Isaqanova.
Onyń aıtýynsha, ár otbasyǵa jalpy 3 750 000 teńgeni quraıtyn 15 myń teńgelik ataýly áleýmettik sertıfıkattar beriletin bolady. «Densaýlyq saqtaý basqarmasy 70 otbasynyń, Pavlodar qalasynyń Bilim bólimi 70 otbasynyń, Jumyspen qamtý jáne áleýmettik baǵdarlamalar bólimi jalǵyz turatyn 24 qarttyń, úkimettik emes uıymdar 22 januıanyń, Qyzyl Jarty aı qoǵamy 44 otbasynyń, «Nur Otan» 20 otbasynyń tizimin usyndy», - dedi G.Isaqanova.
Fılıal basshysynyń atap ótýinshe, Qyzyl Jarty aı qoǵamyna «Igi ister ómirdi ózgertedi» atty uranymen iri halyqaralyq kompanııalardyń biri demeýshilik jasaǵan. Kompanııa áleýmettik jobany júzege asyrýǵa 23 mln teńge bóldi. Onyń aıasynda Nur-Sultan, Almaty, Shymkent, Qaraǵandy, Óskemen jáne Pavlodar qalasynyń asa muqtaj otbasylary sýpermarketterdiń birinen azyq-túlik pen basqa da qajetti zattardy alýǵa aqshalaı sertıfıkattar alatyn bolady.
