«Qarı bolǵym keledi» kitaby jaryq kórdi (FOTO)
Almaty qalasynda ıslamtanýshy, «Baıken» meshitiniń ustazy ári «Balapan qarı» ortalyǵynyń jetekshisi Malıka Aıtjanqyzynyń «Qarı bolǵym keledi» kitabynyń tanytymy ótti.
Taǵylymdy is-sharaǵa QMDB-nyń Din isteri jáne taldaý bóliminiń meńgerýshisi Nurbek Esmaǵanbet, Almaty qalasynyń bas ımamy Tólebı Ospan, Nur-Múbarak Egıpet ıslam mádenıeti ýnıversıtetiniń prorektory Qaırat Qurmanbaev, Almaly aýdandyq «Tóle bı» meshitiniń bas ımamy Ersin Ámire, Nur-Múbarak ýnıversıtetiniń oqytýshylary Baýyrjan Álıuly men Qurmanǵazy Sadybaev qatysty.
Almaty qalasynyń bas ımamy, qarı Tólebı Dádiluly: «Qasıetti Quran – Allanyń sózi. Alla Taǵalanyń sózin tolyq jattaý – ısi musylmannyń armany ekeni sózsiz. Alla Elshisi (oǵan Allanyń salaýaty men sálemi bolsyn) óziniń hadıs shárıfinde: «Adamdardyń eń jaqsysy – Qurandy jatqa bilgen, Allanyń dinin jaqsy túsingen, adamdardy jaqsylyqqa shaqyryp, jamandyqtan tyıǵan jáne týǵan-týyspen qarym-qatynasy óte kórkem bolǵan jan» degen. Allaǵa shúkir, búginde elimizde qarılyqqa nıet etip, Quran jattaýǵa yqylas tanytýshylardyń qatary kúnnen kúnge artyp keledi. Bul – óte qýanarlyq jaıt. Tek osy maqsatta tabandylyq, sabyrlyq pen yqylas kerektigin basa eskergenimiz abzal. Jattaýdyń kóptegen ádis-tásilderi men artyqshylyǵy qamtylǵan bul kitap, qalyń oqyrmen úshin ásirese, Quran jattap, qarı atanǵysy keletin yntaly qaýymǵa paıdaly bolady dep senemin» degen jyly lebizin bildirip, kitap tanytymyn ashyp berdi.
Kitapta elimizdegi 6 qarıdyń pikiri berilgen. Onyń biri – Qurannan 5 qyraǵat ıesi, qarı Ersin Ámire.
«Qarı bolǵym keledi» kitaby Quran jolynda, ony úırený, úıretý arqyly úmbettiń eń qaıyrlysy bolý jolynda sizderge shamshyraq bolady dep úmittenemin. Alla Taǵaladan osy eńbekti jazǵan qazaq tilindegi alǵashqy avtoryna, sondaı-aq musylman úmbetiniń eki dúnıesine qaıyrly, paıdaly bolýyn suraımyn» dedi Ersin qarı.
Malıka Ergeshovanyń «Qarı bolǵym keledi» kitaby jalpy oqyrman qaýymǵa, ásirese Quran úırenip, ony basqalarǵa úıretemin deýshilerge arnalǵan. Atalmysh eńbekte Qurannyń ýahı bolyp túsken sátindegi jattaý erekshelikteri týraly, qazirgi ýaqyttaǵy álemdik qarılyq ádistemeleri usynylǵan. Odan ózge bolashaq qarılarǵa paıdaly aqyl-keńester de qamtylypty. Taǵy aıta keterligi, kitapqa QMDB saraptama sektorynyń oń qorytyndysy berilgen.
Atalǵan sharadaǵy qonaqtar qatarynda ustaz, din mamandarynan ózge óner azamattary men blogerler de boldy. Solardyń biri, ánshi Móldir Áýelbekova: «Ózim oramal atty tájimdi taqqanyma bir jyldan asa ýaqyt boldy. Imandy kúsheıtetin, rýhanı keshter ózime unaıdy. Óz basym «Qarı bolǵym keledi» kitabyna asa qyzyǵýshylyq tanyttym. Sebebi, balamnyń, inilerimniń qarı bolǵanyn qalaımyn. Osy keshke avtordyń shaqyrǵanyna qýanyshtymyn. Malıka ustazǵa kitaptyń ár oqylǵan ár árpine saýaptan jazsyn deımin.Ár otbasyda Qudaı qalasa bir emes, birneshe qarıdan bolýyn tileımin. Ustazdarymyz ben osyndaı kitaptarymyz arqyly ımandy, salıqaly urpaǵymyz tárbıelene bersin!» degen lebizin bildirdi.
Shara qortyndysynda kitaptyń avtory, «10000 qarı daıyndap shyǵarsam» degen armany bar Malıka Aıtjanqyzy ózi úsh jyl tárbıelegen shákirtine, Qurandy tolyq jattap, qarı atanǵan qurmetine oraı resmı túrde tájin kıgizip, kýáligin tabystady.
Ár shańyraqta Quranǵa amal etýshi qarılar kóp bolsyn!
