Qarılar daıyndaý ortalyǵynyń irgetasy qalandy (FOTO)
QMDB Tóraǵasy, Bas múftı Naýryzbaı qajy Taǵanuly Qyzylorda oblysy Belkól kentindegi 80 oryndyq Qarılar daıyndaý ortalyǵynyń alǵashqy kirpishin qalaý saltanatyna qatysty.
Igi sharaǵa QMDB Apparat basshysy Ǵylymbek Jádigeruly, Qyzylorda oblysynyń bas ımamy Bolatbek Ulasqanuly, Syr ımamdary men demeýshi azamattar qatysty.
Ortalyqtyń alǵashqy kirpishin qalaý rásimi Quran oqýmen bastalyp, keıin qurban shalyndy. Sharaǵa arnaıy qatysqan Naýryzbaı qajy Taǵanuly ortalyqtyń Syr eli úshin mańyzy joǵary ekenine toqtaldy.
Qarılar daıyndaý ortalyǵy Qalmuhammed ıshan meshiti janynda ornalasqan. Keshen eki qabattan turady. Sondaı-aq munda Nur-Múbarak ýnıversıtetine talapker daıyndaıtyn ortalyq jumys isteıdi. Mundaǵy shákirtter buǵan deıin meshit janynan Quran jattap kelgen bolatyn. Jańa keshenniń qurylysy keler jyly bastalmaq.
