Qarııany qadirleý – qanǵa sińgen saltymyz

Halqymyz «Qarty bar eldiń qazynasy bar» deıdi. Biz qarııasyn qurmettegen, úlkenin syılaǵan, «qarttarym – qazynam» dep baǵalaǵan elmiz.

Aq saqaldy ata men aq jaýlyqty ájeniń biz úshin orny bólek. Allaǵa shúkir, elimizde baıyrǵy babalardan kele jatqan osy bir sabaqtastyq áli kúnge óz qundylyǵyn joıǵan joq. Qarııany qurmetteý – bizdiń babalardan mıras bolǵan qasterli muramyz ispetti. Memleketimiz de qarııalaryn árqashan qoldap keledi. Olarǵa kórsetiletin kómektiń kólemi de jyl saıyn ulǵaıýda. Bul – úlken qamqorlyq. Qazaqstan musylmandary dinı basqarmasy da óz múmkindigi aıasynda qarttarǵa qamqorlyq tanytyp keledi.   

Búgingi qazynaly qarttarymyz jastyq shaǵyn elimizdiń gúldenýi men damýyna arnady. Olar osy qoǵamnyń irgetasyn qalap, táýelsizdigimizdi baıandy etý jolynda ter tókti. Áli kúnge deıin atalarymyz ben ájelerimiz otbasynyń uıytqysy, shańyraqtyń shattyq-berekesine aınalyp, jas urpaqqa ónegeli tárbıe berip, tilin, dinin, dástúrin qadirleýge shaqyryp keledi. Sondyqtan elimizdegi iske asyp jatqan barlyq ıgilikterdiń bastaýynda osy qazynaly qarııalar turǵanyn umytpaýymyz qajet.

Hadıs-shárıfterde «Úlkenderin qurmettemegen, kishilerge meıirim etpegen adam bizden emes» delingen. Mahambet Ótemisuly «Kárisi kimniń joq bolsa, jastary bolar dýana» degen. Ardagerlerimizdiń aqyly – darııa, ómiri – ónege. Sondyqtan olarǵa qurmet kórsetý – bizge mindet. Syn saǵatta súıeý bolǵan, qashan da el-jurttyń qamqoryna aınalǵan aq saqaldy atalarymyz ben aq jaýlyqty ájelerimiz aman bolsyn! Ámın!​

Naýryzbaı qajy TAǴANULY

Qazaqstan musylmandary dinı basqarmasynyń Tóraǵasy, Bas múftı