Qasym-Jomart Toqaev ramazan aıynyń bastalýymen quttyqtady
Memleket basshysy Qasym-Jomart Toqaev Qazaqstan halqyn Ramazan aıynyń bastalýymen quttyqtady. Bul týraly Prezıdenttiń Baspasóz qyzmeti habarlady.
«Bul – kúlli musylman qaýymy úshin rýhanı turǵydan jańarý kezeńi. Sondaı-aq, Oraza aıynda ózara syılastyq pen meıirim, izgilik pen keshirim sııaqty asyl qasıetter dáripteledi. Jurt kómekke muqtaj jandarǵa qol ushyn berip, qaıyrymdylyq kórsetýge, saýapty is atqarýǵa umtylady. Islam dininiń osyndaı myzǵymas rýhanı qundylyqtary men jasampazdyq áleýeti qoǵamymyzdaǵy birlik pen yntymaqty odan ári nyǵaıtýǵa yqpal etedi.
Ókinishke qaraı, bıyl da Ramazan aıy kúrdeli kezeńde ótetin boldy. Juqpaly dertti aýyzdyqtaý úshin barlyq sharalar jasalýda. Elimizdegi musylman jamaǵatyn qaýipsizdik talaptaryn saqtaýǵa, Qazaqstan musylmandary dinı basqarmasynyń usynymdaryn múltiksiz oryndaýǵa shaqyramyn. Biz bul synaqty aýyzbirshilik pen jaýapkershiliktiń arqasynda eńseretinimiz sózsiz. Tutqan orazalaryńyz qabyl bolsyn!» dedi Prezıdent.
Sondaı-aq Memleket basshysy elimizge amandyq, ár shańyraqqa baq-bereke tiledi.
