Qazaqstan musylmandary dinı basqarmasynyń bes ýaqyt namaz ben juma namazyna qatysty málimdemesi
Qurmetti musylman qaýym!
Jýyrda memlekettik vedomstvoaralyq komıssııasynyń (VAK) selektorlyq otyrysynyń sheshimi boıynsha 2 qarashadan bastap elimizdiń barlyq meshitterinde (juma namazyn qospaǵanda) bes ýaqyt namaz ótkizýge ruqsat berilgen bolatyn.
Osyǵan oraı, Qazaqstan musylmandary dinı basqarmasy meshitterde juma namazyn oqýǵa qatysty el turǵyndaryna kelesideı málimdeme jasaıdy:
Birinshiden, qazirgi ýaqytta elimizdiń meshitterinde kúndelikti bes ýaqyt namaz jamaǵatpen oqylady, alaıda juma namazy ýaqytsha oqylmaıdy.
Osyǵan oraı, QMDB musylman qaýymyn memleket zańyna moıynsunýǵa jáne túrli arandatýshylyq áreketterge salynbaýǵa shaqyrady. Óıtkeni, Ábý Hanıfa mázhabynda juma namazy durys bolý úshin memleket basshysy nemese onyń orynbasary jalpy ruqsat (ızn ǵam) berýi shart. Bul jaıynda Mýlla Alı Qarı (Alla ony raqymyna alsyn) bylaı deıdi: «Juma namazyn óteý úshin jalpy ruqsat (ızn ǵam) etilýi shart. Sebebi, juma namazy – Islam belgileriniń biri. Ol adamdar arasynda ashyq túrde oryndalýy tıis («Fáthý bab ál-ǵınaıa», 1/565). Sondaı-aq, sharıǵatta: «Imam (basshy) zańdy negizde el turǵyndaryna jınalýǵa ruqsat etpese, halyq jınalmaýy kerek», – dep aıtylǵan («Fátaýa Hındııa», 1/206).
Ekinshiden, hanafı mázhabynda: «Juma namazyn oqýǵa ruqsat etilmegen jaǵdaıda, besin namazy kúndegideı jamaǵatpen oqylady», – delingen («Fátaýa Bázzázııa», 1/69). Sondyqtan juma kúni besin namazy meshitterde sanıtarlyq talaptardy saqtaǵan halde jamaǵatpen oqýǵa ruqsat etiledi nemese úıinde oqıdy.
Qurmetti jamaǵat!
Qazaqstan musylmandary dinı basqarmasy elimizdegi meshitter jamaǵatyn Úkimetimizdiń juma namazyn ýaqytsha toqtatýyna baılanysty sheshimine túsinistikpen qaraýǵa jáne oǵan sabyrlyq tanytýǵa shaqyrady.
Alla Taǵala elimizdi birlikten aıyrmasyn, halqymyzǵa amandyq, dinimizge qýat bersin! Ámın!
Qazaqstan musylmandary dinı basqarmasy
