Qazaqstan prezıdenti ımamdar forýmyna quttyqtaý joldady (FOTO+VIDEO)
Búgin elordada Qazaqstan musylmandary dinı basqarmasynyń 30 jyldyq mereıtoıyna oraı ótip jatqan «Islam – mádenıet pen izgiliktiń bastaýy» atty ımamdardyń IV respýblıkalyq onlaın-forýmyna Qazaqstan Prezıdenti Qasym-Jomart Toqaev quttyqtaý joldady.
Prezıdenttiń quttyqtaý sózi LED Ekranda beıne jazbada berildi. Memleket basshysy eń aldymen forým qatysýshylaryn Qazaqstan musylmandary dinı basqarmasynyń 30 jyldyq mereıtoıymen quttyqtap, IV respýblıkalyq ımamdar forýmy múftııattyń uıymdastyrýshylyq qyzmetin jańa bir beleske kóterip, rýhanı bastamalarǵa tyń serpin beretinin atap ótti. Sonymen qatar forým jumysyna jańa jetistikter tiledi.
Aıta ketsek, forým maqsaty – musylman qaýymy arasynda ulttyq rýhanı dástúrlerge negizdelgen dinı rásimder men joralardyń mádenıetin qalyptastyrý jáne zııatker ımam mártebesine laıyqty din qyzmetkerlerin irikteıtin qujattardy qabyldaý.
Forýmnyń qorytyndysy boıynsha «As berý mádenıeti», «Zırat jáne zııarat mádenıeti», «Zııatker ımam» qujattary qabyldanady. Atalǵan qujattar jurtshylyq arasynda oryndalatyn dinı rásimderdi birizdilikke keltirýge jáne zııatker ımam mártebesin berýge laıyqty din qyzmetkerlerin irikteýge oń yqpalyn tıgizbek.
