QAJYLYQ-2024: ÁÝE TASYMALY NAQTYLANDY (FOTO)
Qazaqstan musylmandary dinı basqarmasy 2023 jylǵy qajylyqqa ózderi tańdaǵan otandyq jáne sheteldik áýe kompanııalarymen barǵan otandastarymyzdyń jáne olarǵa qyzmet jasaǵan týroperatorlardyń rızashylyǵy men suranysyn eskere otyryp, 2024 jylǵy qajylyq maýsymynda azamattarymyzdy qajylyqqa aparýda qolaıly tasymaldaý úshin ádil básekelestikke qol jetkizý maqsatynda qazaqstandyq jáne sheteldik áýekompanııalar arasynda konkýrs jarııalaǵan bolatyn.
Konkýrsqa qazaqstandyq «Air Astana» jáne «Scat», sondaı-aq saýdııalyq «Saudi Arabian Airlines», «Flynas». «Manasik Aviation» jáne kýveıttik «Jazeera», BAÁ «Air Arabia», túrkııalyq «Turkish Airlines» áýe kompanııalary qyzyǵýshylyq bildirip, tıisti qujattaryn ótkizdi.
2024 jylǵa konkýrstyq negizde qajylyqty uıymdastyrýǵa ruqsat alǵan 17 qazaqstandyq týroperator arasynan daýys berý arqyly arnaıy komıssııa quryldy. Komıssııa músheleri básekelestikke túsken atalǵan áýe kompanııa ókilderimen tıisti kelissózder júrgizdi.
Nátıjesinde bul komıssııa músheleri, joǵarydaǵy áýe kompanııalar arasynan qolaıly baǵa men sapa usynǵan 5 áýe kompanııany tańdap aldy.
Atap aıtqanda, tikeleı reıster arqyly qajylarymyzdyń qasıetti mekenge jyldam jetýi úshin qazaqstandyq «Scat», saýdııalyq «Flynas» áýe kompanııasy tańdaldy.
Salystyrmaly túrde arzanyraq ári tıisti deńgeıdegi qyzmetti qalaǵan týroperatorlar úshin «Jazeera» jáne «Air Arabia» áýe kompanııasy tańdaldy.
Álemniń úzdik áýe kompanııalarynyń qataryna kiretin «Turkish Airlines» áýe kompanııasy da qajylarymyzdyń qalaýyna oraı tańdaldy.
2024 jylǵy qajylyq maýsymynda Qazaqstan qajylaryn qazaqstandyq «Scat», saýdııalyq «Flynas», kýveıttik «Jazeera», BAÁ «Air Arabia», túrkııalyq «Turkish Airlines» áýe kompanııalary tasymaldaıdy.
Qajylarymyz Astana, Almaty, Shymkent, Túrkistan jáne Aqtaý qalalarynan ushaqqa otyryp, Jıdda (Mekke mańyndaǵy qala) jáne Medına qalalaryna 02-12.06.2024 j. merzimi aralyǵynda jetkizilip, 20-27.06.2024 j. merzimi aralyǵynda elge qaıtarý josparlanýda.
Aıta keteıik, budan aldyn habarlaǵanymyzdaı Saýd Arabııa Koroldigi Qajylyq jáne umra mınıstrliginiń talaby boıynsha «Qajylyq-2024» maýsymyna osy jyldyń 15 jeltoqsanyna deıin tirkelgen jáne tıisti tólemderi jasalǵan azamattarǵa ǵana qajylyq oryndary bóletindigin jetkizemiz.
Derekkóz: QMDB Baspasóz qyzmeti
