Qajylyq saparyna qatysty QMDB málimdemesi
Qazaqstan musylmandary dinı basqarmasynyń Qajylyq bólimi jyl basynan beri 2021 jylǵy qajylyq maýsymyna qatysty resmı málimdemeler men jańalyqtardy buqaralyq aqparat quraldaryna júıeli túrde jarııalap, halyqty habardar etip keledi. Sonymen qatar Saýb Arabııa Koroldiginiń Densaýlyq saqtaý jáne Qajylyq mınıstrliginiń pandemııa jaǵdaıyna baılanysty qabyldaǵan talaptary men sheshimderi jaıly málimetti musylman qaýymyna túsindirý jumystaryn júzege asyrýda.
QMDB Qajylyq bólimi Saýd Arabııa Koroldiginiń qabyldaǵan sheshimine sáıkes, Qazaqstan azamattary úshin 2021 jyly úlken jáne kishi qajylyq rásimderin atqarýǵa shekteý qoıylǵanyn osyǵan deıin birneshe ret málimdedi. Alaıda QMDB ustanymy men talabyn eskermegen týrıstik kompanııalardyń biri kishi qajylyq saparyn uıymdastyrý úshin elimizdegi musylman jamaǵaty arasyna jarnamalyq habarlar taratyp, túsinbeýshilik týdyrdy. Bul áreket QMDB jumysy men bedeline nuqsan keltirdi. Sonymen qatar, qajylyqpen aınalysatyn ózge de týrıstik fırma basshylary arasynda kelispeýshiliktiń týyndaýyna túrtki boldy.
QMDB talaptaryn óreskel buzyp, kishi qajylyqqa 143 Qazaqstan azamatyn aparǵan týrıstik kompanııanyń ekpe saldyrýǵa baılanysty jalǵan qujat ázirlegeni anyqtaldy. Bul týraly Qazaqstan Respýblıkasynyń Ishki ister mınıstrligi resmı túrde málimdedi. Osy rette Qazaqstan musylmandary dinı basqarmasy taǵy da tómendegini málimdeıdi:
Birinshiden, Qazaqstan azamattary úshin qajylyq sapary Qazaqstan musylmandary dinı basqarmasyna qarasty Qajylyq mıssııasynyń uıymdastyrýymen jáne mıssııanyń tıisti talaptary men nusqamalary negizinde júzege asady.
Ekinshiden, QMDB jáne Saýd Arabııa Koroldiginiń Qajylyq mınıstrligi arasynda qabyldanǵan resmı kelisim qujatyna sáıkes, qajylyqqa qatysty resmı qujattardy rásimdeý, tıisti mekemelermen kelissózder júrgizý, t.b. is-sharalar Dinı basqarma tarapynan oryndalady.
Úshinshiden, QMDB qajylyq saparynyń Islam sharıǵaty men Ábý Hanıfa mázhaby negizinde oryndalýyn qadaǵalaıdy.
Tórtinshiden, qajylyq saparyna nıet etken azamattar QMDB Qajylyq bóliminiń nusqamalary, keńesteri men resmı aqparattaryna sáıkes sheshim qabyldaýy qajet ekenin jetkizemiz.
Besinshi, ardaqty Paıǵambarymyz Muhammed (oǵan Allanyń salaýaty men sálemi bolsyn) qasıetti hadıs-sharıfteriniń birinde: «Bizdi aldaǵan adam bizden emes» degen. Qajylyq sapary aldynda jalǵan qujat jasap, sharıǵat pen zań talaptaryna sáıkes kelmeıtin áreketke barý kúná ári qylmystyq is ekenin jetkizemiz.
