«Qazvac» vaktsınasy tekseristen ótýde (FOTO)
Bas múftı Naýryzbaı qajy Taǵanulynyń tapsyrmasymen naıb múftı Ershat Aǵybaıuly bastaǵan QMDB delegatsııasy Jambyl oblysyndaǵy «QAZVAC» vaktsınasyn óndirýshi Bıologııalyq qaýipsizdik problemalarynyń ǵylymı-zertteý ınstıtýtynda bolyp, otandyq vaktsına óndirisimen tanysty.
Revızorlyq baqylaý-qadaǵalaýǵa «Halal Damý» dırektory Aıbek Asqarbekuly, Sharıǵat jáne pátýa bóliminiń mamany Baýyrjan Ábdýáli, tehnolog, medıtsına mamany Aızat Sataeva qatysty.
«Epıdemııalyq jaǵdaıǵa baılanysty koronavırýs ınfektsııasyna qarsy kúresýdiń jáne ujymdyq ımmýnıtetti qalyptastyrýdyń tıimdi ádisi – vaktsınalaý. Osy oraıda halyqtyń 70% quraıtyn musylmandar men halal ónimdi tutynýshylardyń talap-tilegi boıynsha óndirýshiler tarapynan «QAZVAC» vaktsınasyn halal standarty boıynsha sertıfıkattaýdan ótkizýge ótinish bildirildi. Sebebi, otandyq vaktsınaǵa Indonezııa, Iran, Aýǵanstan, Ózbekstan, Qyrǵyzstan, Tájikstan sekildi sheteldik musylman elderi de qyzyǵýshylyq tanytýda.
«QAZVAC» – COVID-19-ǵa qarsy belsendiligi joıylǵan vırýstan daıyndalǵan, tazartylǵan, adıývant – alıýmınıı gıdrototyǵy qosylǵan, kontsentratsııalanǵan vaktsına. Ǵalymdar júrgizgen klınıkalyq synaqtyń III kezeńiniń nátıjesi boıynsha vaktsınanyń tıimdiligi 90%-dan joǵary. Bul rette, vaktsınanyń sharıǵatqa saı daıyndalýyn qadaǵalaý maqsatynda asa qaýipti ınfektsııalardyń qozdyrǵyshtarymen jumys jasaýǵa baǵyttalǵan ınstıtýt zerthanasymen tanystyq. Buǵan deıin «QAZVAC» vaktsınasyn quraýshy negizgi komponentterdi jeke-jeke qarastyryp, sharıǵat jáne pátýa mamandarynyń nazaryna usynǵan bolatynbyz. Almaty qalasynda bastalǵan ǵulamalar keńesinde osy másele boıynsha dinı sarapshylardyń pikiri nazarǵa alynady» dedi Ershat Aǵybaıuly.
«QAZVAC» vaktsınasyn «QMDB Halal» standarty boıynsha sertıfıkattaý protsesi áli aıaqtalmaǵanyn eskerte otyryp, qorytyndysyn aldaǵy ýaqytta jarııalaıtynymyzdy habarlaımyz.
