QMDB-2020: Jyldyń eleýli jeti jańalyǵy (FOTO)
Qazaqstan musylmandary dinı basqarmasynyń san-salaly qyzmetindegi osy jyldyń eleýli jeti jańalyǵyn nazarlaryńyzǵa usynamyz.
Bas múftı saılandy. Nur-Sultan qalasynda ótken Qazaqstan musylmandary dinı basqarmasynyń kezekten tys IH Quryltaıynda Serikbaı qajy Oraz QMDB tóraǵasy, Bas múftı qyzmetine Naýryzbaı qajy Taǵanulynyń kandıdatýrasyn usyndy. Quryltaıǵa jınalǵan 300 delegat Serikbaı qajy Orazdyń usynǵan kandıdatýrasyna biraýyzdan daýys berip, qoldaý kórsetip, Naýryzbaı qajy Taǵanulyn Bas múftılikke saılady.
Bes múftıdiń basqosýy. Múftııatty ár jyldary basqarǵan Rátbek qajy Nysanbaıuly, Ábsattar qajy Derbisáli, Erjan qajy Malǵajyuly, Serikbaı qajy Oraz, Bas múftı Naýryzbaı qajy Taǵanuly elordada basqosyp, bir ústel basynda suhbattasty, Dinı basqarmanyń bolashaǵy jaıly oı bólisti. Din qaıratkerlerine qurmet kórsetilip, merekelik medalmen marapattaldy. Tarıhı sát taspaǵa jazylyp, múftııat muraǵatyna berildi.
Imamdar forýmy. Elordada ımamdardyń IV respýblıkalyq onlaın-forýmy ótti. Tarıhı basqosýǵa Memleket basshysy Qasym-Jomart Toqaev beıneúndeý joldady. Prezıdenttiń quttyqtaý sózi LED Ekranda beıne jazbada berildi. Memlekettik hatshy Qyrymbek Kósherbaev Elbasynyń QMDB-nyń 30 jyldyq mereıtoıyna joldaǵan quttyqtaý sózin oqyp berdi. Forýmda «As berý mádenıeti», «Zırat jáne zııarat mádenıeti», «Zııatker ımam» tujyrymdamasy qujattary qabyldandy.
«Halyq arna» telearnasy. Osy jyly QMDB-nyń tól telearnasy – «Halyq arna» ashyldy. Arna «OtaýTV» jáne ID tsıfrlyq telearnasy arqyly habar taratýda.
Aqparat jáne qoǵammen baılanys bólimi. Bas múftı bastamasymen QMDB janynan Aqparat jáne qoǵammen baılanys bólimi ashyldy. Bul – QMDB Ortalyq apparatynda eń aýqymdy bólim. «Ǵalamtormen jumys» sektoryn, «Hıkmet TV» teleradıostýdııasyn, muftyat.kz jáne óńirlik 21 saıtty biriktirgen bólim mindeti – Dinı basqarmanyń 4 baǵyt boıynsha atqaratyn qyzmetin úzdiksiz nasıhattaý.
Dinı ońaltý bólimi. QMDB janynan Dinı ońaltý bólimi ashyldy. «Dinı basqarmanyń negizgi jumys baǵyttarynyń biri – destrýktıvti dinı aǵymnyń arbaýynda ketken azamattardy ońaltý, olarǵa dinı keńes berip, túsindirme, nasıhat jumystaryn júrgizý. Osy baǵyttaǵy jumysymyzdy jandandyrý maqsatynda «Dinı ońaltý» bólimin ashtyq» dedi Bas múftı Naýryzbaı qajy Taǵanuly.
Qaıyrymdylyq. Osy jyly QMDB «Zeket» qorynyń «El úlesi – páterge» jobasy aıasynda 142 muqtaj otbasyǵa páter kilti tabystaldy. Al joba júzege asqan sátten beri 342 otbasy baspanaly boldy. Bas múftı Naýryzbaı qajy Taǵanulynyń uıytqy bolýymen, aımaqtaǵy ımamdardyń yjdahatty jumysy men demeýshi azamattardyń kómegimen elimiz boıynsha 1 jyldyń ishinde 73 qudyq, 43 kópir el ıgiligine berildi.
