QMDB: Bas ımamdar merekelik medalmen marapattaldy (FOTO)
QMDB Tóraǵasy, Bas múftı Naýryzbaı qajy Taǵanuly 2020 jyldyń keńeıtilgen Tóralqa májilisinde 19 ókildiktiń bas ımamdaryn «QMDB 30 jyl» merekelik medalimen marapattady.
Jyldyń qorytyndy jıynynda Bas múftı syndarly sátte jaqsylyqtyń jarshysy bola bilgen ımamdar qaýymyna, meshit qyzmetkerlerine alǵysyn jetkizdi.
«Synaqqa toly 2020 jyldy da aman-esen ótkerdik. El basyna kún týǵanda jaqynyna janashyr bolǵan azamattardyń alǵy shebinde aq sáldeli ımamdarymyz júrdi. Karantın ýaqyty Ramazan aıyna tuspa-tus kelgende meshitterde bas qosyp, aýyzashar bere almasa da, aýyzashar qorjyndaryn taratyp, orazanyń qýanyshty sátterin jamaǵatqa sezdire alǵan da, Qurban aıt kelip, qashyqtan qurban shalýǵa ókil bolyp, kóptiń amanatyn moınyna júktegen de ımamdarymyz edi. Kúni keshe ótken ımamdardyń IV respýblıkalyq onlaın-forýmynda da Elbasy Nursultan Nazarbaev pen Prezıdent Qasym-Jomart Toqaev, birqatar memleket jáne qoǵam qaıratkerleri din qyzmetkerleriniń eńbegin baǵalap, alǵysyn bildirdi. Qazaqstan musylmandarynyń qara shańyraǵy Dinı basqarmanyń 30 jyldyǵy qutty bolsyn»,- dedi Bas múftı.
Aıta ketelik, «QMDB 30 jyl» merekelik medali bas ımamdardan bólek óńirlerdegi 68 ımamǵa tartý etildi.
