QMDB: Kezekti bólim saǵatynda jumys esebi tyńdaldy (FOTO)
Elordada Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń tóraǵalyǵymen kezekti «Bólim saǵaty» ótip, Qajylyq bólimi, «Tawaf Travel» qajylyq fırmasy men «Halal Damý» standart jáne sertıfıkattaý uıymynyń esebi tyńdaldy.
Jıynǵa QMDB tóraǵasynyń orynbasary, naıb múftı Ershat Aǵybaıuly, Apparat basshysy Ǵylymbek Jádigeruly jáne de bólim basshylary qatysty.
Aldymen Qajylyq bóliminiń meńgerýshisi Jándillá Bekjigitov bólimniń negizgi jumys baǵytymen tanystyrdy. Atap aıtqanda, QMDB men Saýd Arabııasy Koroldiginiń Qajylyq jáne umra mınıstrligi arasynda jasalatyn kelisimsharttyń mańyzdylyǵy, qajylyqtyń Elektrondy júıesiniń jyl saıyn jańaryp otyrýy, týrıstik operatorlarǵa kvota bólýdiń talaptaryna toqtaldy.
Budan bólek qajylyq ortalyqtarynyń jumysyn jetildirý jáne qajylyqqa baryp kelgen azamattarmen baılanysty úzbeý jóninde pikir bildirdi.
«Elimizdiń úlken qalalary men oblystyq ortalyq meshitter janynan «qajylyq ortalyqtaryn» ashýdy jalǵastyra beremiz. Onda qajylyq jumystaryna bekitilgen jaýapty ókilder qajylyq pen umraǵa nıet etýshi otandastarymyzdy QMDB qajylyq kompanııasyna joldap otyrady. Sonymen birge qajylyq jumystaryn uıymdastyrýdaǵy basty máseleniń biri – bolashaq qajylardy dinı, rýhanı, moraldyq turǵydan daıyndaýǵa jan-jaqty atsalysady.
Odan keıin qajylyqqa baryp kelgen kisilermen jumys isteý. Qajylyqty uıymdastyrý – zor mártebe ári úlken jaýapkershilik. Halqymyz «qajy» degen atty qurmettep, qajylyqqa barǵan azamattardy ardaqtap, olarǵa iltıpat kórsetip keledi.
Muhammed Paıǵambarymyzdyń (oǵan Allanyń salaýaty men sálemi bolsyn) bir hadısinde: «Jaqsy adam – qoǵamǵa paıdasy tıgen pende» – degen. Demek, qoǵamǵa paıdaly bolǵanyń – jaqsy musylman bolǵanyń. Qoǵamǵa paıdasy tııýde qasıetti mekendi zııarat etip kelgen qajylarymyz aldyńǵy qatarda turýy tıis.
Óziniń ónegesimen, kórkem minezimen, adaldyǵymen, ádildigimen qashanda ózgelerge ónege bolý tıis ekendigi aıtylyp, ol kisilermen udaıy baılanysta bolyp, olardy meshitterdiń qoǵamdyq jumystaryna belsene aralastyrý jer-jerdegi ımamdarymyzǵa tapsyrylady» dedi J.Bekjigitov.
«Tawaf Travel» qajylyq fırmasynyń dırektory Bektemir Iskakovtyń sózine súıensek, bıyl qajylyqtan bólek úsh túrli baǵytta jumys isteý josparlanǵan.
«Ishki týrızm baǵytynyń ózin úshke bóldik. Birinshi, tarıhı, kıeli oryndarǵa saıahat jasaý, ekinshi, Ekotýrızm, ıaǵnı, tiri tabıǵat aıasyna, ózen-kól, taýlarǵa saıahattaý jáne úshinshi, densaýlyq týrzımi – shıpajaılar, saýyqtyrý oryndaryna barý. Odan keıin jaqyn shetel – Ózbekstanǵa saıahat jasaýǵa múmkindik beremiz. Besinshi baǵyt – halyqaralyq týrızm. Munda Túrkııa, Malaızııa sekildi memleketterge túrli týrlar jasaý josparlanǵan» deıdi B.Iskakov.
Al «Halal Damý» standart jáne sertıfıkattaý uıymynyń dırektory Aıbek Atashev qoǵamda halal uǵymynyń aýqymy keńeıgenin, musylmandar tarapynan sertıfıkaty bar ónimderge suranys artqanyn tilge tıek etti. Onyń aıtýynsha, buǵan deıin «Halal Damý» JShS «Mal baýyzdaý jáne et óńdeý», «Azyq-túlik jáne qyzmet kórsetý» jáne «Halal» ónimdi óndirý, daıarlaý, óńdeý, saqtaý, tasymaldaý jáne satý qyzmetterine qoıylatyn jalpy talaptar standartymen jumys istese, endigi kezekte «Emdeý profılaktıkalyq jáne dárilik zattar», «Kosmetıkalyq ónimder» standartynyń jobasy daıyndalýda.
«Byltyr QR Ádilet mınıstrliginiń Ulttyq zııatkerlik menshik ınstıtýtynan «QMDB HALAL» taýar tańbasyna № 71209 kýáligi berildi. Sondaı-aq 2020 jyly «QMDB halal» oqytý jáne bilimdi jetildirý ortalyǵy ashyldy, Taraz qalasynda halal jármeńke ótse, Aqtóbede tuńǵysh halal market
iske qosyldy. HALALDAMU.KZ saıty jańartylyp, HALAL GUIDE Mobıldi qosymshasy ázirlendi» dep Aıbek Atashev byltyrǵy birqatar jetistikterdi atap ótti.
Jıyn barysynda Bas múftı Naýryzbaı qajy bólim meńgerýshilerine naqty tapsyrmalar berse, apparat qyzmetkerleri eki bólimniń jumysyna qatysty usynys-pikirlerin jetkizdi.
