«QMDB halal» ortalyǵynda semınar ótti (FOTO)
«QMDB Halal» oqytý jáne bilim jetildirý ortalyǵynda «Kýrochka Rıaba» saýda belgisimen tanylǵan qus eti ónimderin óndirýshi «Capital Projects LTD» kásiporynnyń qyzmetkerlerine oqý-semınar ótkizildi.
«Kýrochka Rıaba» qus fabrıkasy qyzmetkerleriniń halal jóninde bilimin jetildirý maqsatynda ótkizilgen semınarǵa «Halal Damý» dırektory Aıbek Asqarbekuly, QMDB Sharıǵat jáne pátýa bólimi meńgerýshisiniń orynbasary Hasan Amanqul, «Halal Damý» veterınarııalyq sanıtarııa isiniń mamany Danııar Safıev dáris oqydy.
«Tutynýshylar tarapynan «Kýrochka Rıaba» qus fabrıkasy maldy «bısmıllámen» soıa ma, qasapshylar musylman ba degen suraqtar jıi qoıylyp jatady. «Halal Damýdyń» barlyq qus fabrıkalaryna qoıatyn talaby birdeı ári qatań. Bunyń barlyǵy astyń adaldyǵyna júkteletin jaýapkershiliktiń mol ekenin ańǵartady.
Óz kezeginde qus fabrıkalary birneshe satyly tekserýden ótedi: kásiporyn boıynsha aılyq baqylaý, zerthana tekserisi, josparsyz aýdıt jumystary. Sol sebepti ár qyzmetkerdiń halal týraly tolyq da tereń maǵlumaty bolýy biz úshin mańyzdy. Keıbir otandyq qus fabrıkalar men qasaphanalarda janýardy mehanıkalyq tásilmen nemese aýyr zattarmen uryp óltirý qoldanylady. Osyndaı tásildermen soıylǵan maldyń boıynda qan uıyp, aram qannan tolyqtaı tazarmaǵandyqtan ınfektsııa taratyp, nátıjesinde adam aǵzasynda túrli aýrýlar paıda bolady. Mundaı tásildermen baýyzdalǵan mal eti sharıǵat talaptaryna saı emes. Sondyqtan biz respýblıka kóleminde qasapshylardy oqytýdy qolǵa alyp, osyndaı oqý-baǵdarlamasyn uıymdastyryp, oqý ortalyǵyn ashyp otyrmyz», – dedi Aıbek Asqarbekuly oqý ortalyǵynda alǵashqylardyń biri bolyp dáris tyńdaǵan qus fabrıka qyzmetkerlerine.
Semınar barysynda Sharıǵat jáne pátýa bólimi meńgerýshisiniń orynbasary Hasan Amanqul qus kásibi men jem azyǵyna qoıylatyn sharıǵat talaptarǵa tereńirek toqtala otyryp, maldy Alla Taǵala adam rızyǵy úshin jaratqan desek te onyń ózinshe tártibi, mindetteri jáne soıýdyń ádebi bar ekenin túsindirdi. Maldy Allanyń atymen baýyzdamaýy jáne pyshaqpen emes, qınap Elektr togymen nemese basynan uryp óltirý maldyń etin jaramsyz (haram) qylatynyn jetkizdi.
Veterınarııalyq sanıtarııa isiniń mamany Danııar Safıev halal standarty boıynsha qus azyǵynan bastap, baýyzdaý, óńdeý, saqtaý, tasymaldaý jáne satýǵa qoıylatyn barlyq kezeńderge jiti toqtalyp ótti.
Oqý kýrsy sońynda qatysýshylar tarapynan qoıylǵan suraqtarǵa jaýap berildi. Dáris tyńdaýshylary bilimin jetildirýge múmkindik bergen «Halal Damý» uıymdastyrýshylaryna alǵys bildirdi.
