QMDB tóraǵasy Atyraýda azamattarmen jeke túsindirme jumysyn júrgizdi (FOTO)
Qazaqstan musylmandary dinı basqarmasynyń Tóraǵasy Naýryzbaı qajy Taǵanuly Atyraý oblysyna jasaǵan resmı saparynda «Imanǵalı» meshitinde azamattarmen dástúrli emes dinı aǵymdardyń zııany týraly jeke túsindirme jumysyn júrgizdi.
Azamattardy jeke qabyldaǵan Bas múftı olardyń aqıda, fıqh máselesi boıynsha qoıǵan suraqtaryna jaýap berdi. Birneshe saǵatqa sozylǵan jeke yqpal etý is-sharasynda Naýryzbaı qajy Taǵanuly jamaǵatpen birge bolýdyń, Ábý Hanıfa mázhaby men Mátýrıdı senimin ustanýdyń mańyzyn keńinen túsindirip berdi. Sonymen qatar salt pen dástúrge, qoǵamda qalyptasqan qundylyqtarǵa qurmetpen qaraýǵa úndedi.
Kezdesý nátıjesinde jergilikti azamattar dinı senim men ustanym boıynsha shalys basqan qadamdaryna, durys emes baǵytta jazylǵan dinı kitaptardan bilmestikpen aqparat alyp qoıǵanyna ókinetinderin jetkizdi. Sonymen qatar ashyq suhbat júrgizip, kókeıkesti suraqtarǵa jaýap bergen Bas múftıge, Atyraý qalasynyń ımamdaryna alǵysyn bildirdi.
Dástúrli emes dinı aǵymnyń zııany túsindirilgen núkteli kezdesý erkin pikir almasý formatynda ótti.
Aıta ketsek, Bas múftı bastamasymen QMDB janynan qurylǵan jumys toby Atyraý oblysynda ýaǵyz-nasıhat jáne jeke yqpal etý is-sharalaryn ótkizýde. Respýblıkalyq aqparattyq nasıhat top músheleri turǵyndardyń suraǵyna jaýap berýde.
