QMDB tóraǵasy atyraýlyq jastarmen suhbattasty (FOTO)
Atyraý oblysyna is sapary aıasynda QMDB tóraǵasy, Bas múftı Naýryzbaı qajy Taǵanuly jergilikti «Iman jastary» eriktilerimen arnaıy kezdesip, suhbattasty.
Kezdesý barysynda Bas múftı Naýryzbaı qajy Taǵanuly jastardy janashyr bolýǵa, árkez adamgershilikten ajyramaýǵa shaqyrdy.
«Qazirgi aýmaly-tókpeli, qarbalas qoǵamda bireýge janashyr bolý, kádesine jaraý ońaı dúnıe emes. Biraq Sizder shyn nıet etip, saýabyn bir Alladan úmit etip paıdaly ispen aınalysyp júrsizder. Musylman basqa musylman baýyryn keminde ózi sııaqty oılaıdy. Hadıs shárıfte: «Ózi úshin jaqsy kórgen nárseni din baýyry úshin de jaqsy kórmegen adam kámil múmın bola almaıdy» delingen. Qazirgi kezde eriktiler – jaqsylyqtyń qoldaýshysy, jarshysy, nasıhatshysyna aınalyp otyr» deı kele, bıylǵy jyldy Memleket basshysy Qasym-Jomart Toqaev eriktiler jyly dep jarııalady. Osyǵan baılanysty elimizdiń túkpir-túkpirinde ıgi sharalar ótti. Sol ıgilikti isterdiń bastaýynda eriktiler tur», – dep atap ótti Bas múftı Naýryzbaı qajy Taǵanuly.
Sondaı aq, Bas múftı Qazaqstan musylmandary dinı basqarmasynyń negizgi baǵyttarynyń biri – qaıyrymdylyq ekendigine toqtalyp, jastardy dinı ilimdi bolýǵa úndedi.
Eske sala ketelik, kezdesýge QMDB Apparat basshysy Ǵylymbek Jádigeruly, QMDB Aqparat jáne qoǵammen baılanys bóliminiń meńgerýshisi Marat Bektazınov jáne Atyraý oblysynyń Bas ımamy Altynbek Utyshanuly qatysty. Kezdesý sońynda Bas múftı jınalǵan jastarǵa batasyn berdi.
