QMDB tóraǵasy aýdan turǵyndarymen kezdesti (FOTO)
QMDB tóraǵasy, Bas múftı Naýryzbaı qajy Taǵanuly Soltústik Qazaqstan oblysyna jasaǵan jumys sapary barysynda Maǵjan Jumabaev aýdanynda bolyp, jergilikti jurtshylyqpen júzdesti.
Kezdesýge aýdan ákimi Qaırat Omarov, jergilikti ardagerler keńesiniń músheleri, sonymen qatar meshit jamaǵaty qatysty.
Aýdandyq ortalyq meshitte ótken kezdesýde Bas múftı Naýryzbaı qajy Taǵanuly Dinı basqarmanyń ıgi isteri men izgi bastamalary jaıly baıandap ótti. Sonymen qatar Dinı basqarmanyń óz qyzmeti aıasynda basymdyq beretin jeti baǵyt boıynsha júzege asyp jatqan is-sharalary jaıly aqparat berdi.
«Búgin biz Maǵjan Jumabaev aýdanynda salynatyn jańa meshittiń irgetasyn qaladyq. Meshiti bar mekenge Allanyń jaqsylyǵy men berekesi jaýady. Meshitke kelgen jastar izgilik pen meıirimdilikti boıyna sińiredi. Sonymen qatar meshitte járdemge muqtaj jandarǵa qaıyrymdylyq kómek kórsetiledi. Bir sózben aıtqanda, meshiti bar aýyl berekege bólenedi. Allanyń úıin salýǵa nıet etken azamattarǵa aıryqsha alǵysymdy bildiremin. Alla razy bolsyn. Haq Taǵala mol saýaptan jazǵaı» dedi Naýryzbaı qajy Taǵanuly.
Basqosýda Bas múftı Soltústik Qazaqstan oblysyna bilikti bas ımamdy taǵaıyndaǵanyn, bul kadrlyq ózgerister óńirdegi dinı ahýalǵa oń yqpal etetinin atap ótti.
