QMDB TÓRAǴASY AIT NAMAZYN JÚRGIZIP, ÝAǴYZ AITTY

Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly respýblıkalyq Bas meshitte aıt namazyn júrgizip, jamaǵatqa ýaǵyz aıtty.

«Qasıetti Qurban aıt – musylman jurtshylyǵynyń ulyq merekesi. Aıt, ıaǵnı «ál-ǵıdý» sózi mereke, meıram, qýanysh degen maǵynalardy bildiredi. Qasıetti Qurban aıt kúni musylman adam aıt namazyn oqyp, qurban shalyp, aıt merekesimen ózgelerdi quttyqtap, qaıyrymdy ister atqarýǵa tyrysady. Bul kúnderdi ulyqtap, adamdarǵa qýanyshty kóńil-kúı syılaý – taqýalyq belgilerinen. Alla Taǵala Qasıetti Qurannyń «Haj» súresiniń 32-aıatynda «Kim Allanyń belgilerin ulyqtasa, shyndyǵynda ol júrektiń taqýalyǵynan», – dep aıtqan.
Ardaqty Paıǵambarymyz (oǵan Allanyń salaýaty men sálemi bolsyn):‏ «Qurban aıt kúnin mereke retinde atap ótýge maǵan buıryq keldi. Bul kúndi Alla Taǵala tutas úmbet úshin mereke etti», – degen.

Ata-babalarymyz aıt kúnderi ulyq merekeni qurmet tutyp, erekshe kıimderin kıip, jaqyn-týǵandaryn aralap: «Aıt qabyl bolsyn!», «Aıt qutty bolsyn!» degen sózdermen izgi nıetterin bildirip, balalarǵa aıttyq syılyqtar beretin bolǵan» dedi Naýryzbaı qajy Taǵanuly.

Bas múftı aıt namazynan keıin elimiz ben jerimizdiń bolashaǵy jolynda qaza tapqan ata-baba rýhyna qasıetti Quran aıattaryn baǵyshtady. Sonymen qatar meshit aýlasynda ótken merekelik is-sharaǵa qatysyp, jamaǵatqa ıgi tilegin jetkizdi.