QMDB tóraǵasy dinı ońaltý jumysy jaıly pikir almasty (FOTO)
Búgin Atyraý oblysyna resmı saparmen barǵan Bas múftı Naýryzbaı qajy Taǵanuly jergilikti ákimdikte memlekettik mekeme basshylarymen kezdesip, dinı ońaltý jumystary jaıly pikir almasty.
«Biz ótken jyly QMDB janynan Dinı ońaltý bólimin ashtyq. Qazir osy bólimniń jumysyn júıeli túrde jandandyryp, jastarymyzdyń dinı kózqarasyn túzeýge kúsh salyp otyrmyz. Jalpy profılaktıkalyq is-sharalar boıynsha 2021 jyldyń alǵashqy jarty jyldyǵynda destrýktıvti dinı aǵym ıdeologııalarynyń taralýyna qarsy 5018 is-shara uıymdastyryldy. Oǵan 1 053 411 adam qatysty. Al túzeý mekemelerinde atqarylǵan jumystyń nátıjesinde 38 jazasyn óteýshi azamat dástúrli Hanafı mázhabyna beıimdeldi. Al 15 adamnyń dinı kózqarasy ońaldy, ıaǵnı Hanafı mázhabyn ustanyp, destrýktıvti dinı aǵym ıdeologııasynan bas tartty. Alla qalasa, bul baǵyttaǵy jumysymyz júıeli túrde júzege asa beredi» dedi Naýryzbaı qajy Taǵanuly.
Kezdesý barysynda jergilikti mekeme basshylary dinı ońaltý jumysyna qatysty kókeıde júrgen suraqtaryn Bas múftıge qoıyp, ortaq is-sharalar tóńireginde áńgimelesti.
