QMDB tóraǵasy Kaırde qazaqstandyq stýdentterdiń suraǵyna jaýap berdi (FOTO)
Qazaqstan musylmandary dinı basqarmasynyń tóraǵasy Naýryzbaı qajy Taǵanuly Mysyr Arab Respýblıkasyna jasaǵan resmı saparynda Kaırde oqyp jatqan stýdenttermen kezdesip, shákirtterdiń suraǵyna jaýap berdi.
Mysyrǵa Dinı basqarma joldamasymen baryp, dinı bilim alyp jatqan stýdentter Bas múftıge kókeıde júrgen suraqtaryn qoıyp, ótinish-tilekterin jetkizdi. Erkin suhbat barysynda bolashaq ımamdar oqýǵa baılanysty qujattardy rásimdeý, Dinı basqarma janynan qurylǵan «Talaba» stýdentter qaýymdastyǵynyń qyzmetin jandandyrý, osy qaýymdastyq janynan qor ashý syndy usynys-tilekterin jetkizip, saýaldaryn joldady.
Stýdentterdi oqý baǵdarlamasyn úzdik bitirýge úndep, el ıgiligi úshin qyzmet etýge shaqyrǵan Bas múftı Naýryzbaı qajy Taǵanuly:
«Hákim Abaıdyń «Sen de bir kirpish dúnıege, ketigin tap ta bar qalan» degen ósıetti óleńi bar. Biz qashan, qaı jerde júrsek te elimizdiń, otbasymyzdyń, urpaǵymyzdyń bolashaǵy úshin aıanbaı eńbek etýimiz kerek. Qoǵamnyń damýyna úles qosýda belsendilik tanytýǵa tıispiz. Dinı basqarma dinı bilim jolynda júrgen sizderge qashan da qoldaý kórsetedi. «Talaba» qaýymdastyǵy, Mysyrdaǵy jaýapty ókilimiz sizderge kez kelgen ýaqytta kómektesýge daıyn. Osynda bir úıdiń balasyndaı tatýlyq tanytyp, bir-birińizge qamqor bolyp júrińizder», – dedi.
Rýhanı keshte Bas múftı stýdentterge dastarhan jaıyp, qurmet kórsetip, batasyn berdi. Kezdesýge 100-den astam stýdent qatysty.
