QMDB Tóraǵasy Halyqaralyq konferentsııada baıandama jasady
QMDB Tóraǵasy Naýryzbaı qajy Taǵanuly Stambul qalasynda ótken «Jahandyq indet, Ekonomıkalyq krızıs jáne tsıfrly álem turǵysynan túrki-Islam áleminiń bolashaǵy men dinı basqarmalar» taqyrybyndaǵy halyqaralyq konferentsııasynda arnaýly baıandama jasady.
Bas múftı baıandamasynda álemdi jaılaǵan pandemııa din ókilderiniń rýhanı álemin álsirete almaǵanyn, din qyzmetkerleri synaq kezinde de qoǵamda izgilik pen meıirimdilik syndy asyl qundylyqtardy keńinen nasıhattap, ózine tıisti jaýapkershilikti oıdaǵydaı atqarǵanyn, bul synaq musylman álemin odan saıyn biriktire túskenin atap ótti. Sondaı-aq QMDB Tóraǵasy baýyrlastyq baılanystardy nyǵaıtyp, birlesken is-sharalardy qolǵa alýdy usyndy.
«Allanyń razylyǵy kózdelgen iste ǵana yqylas pen shynaıy amaldar júzege asady. Ǵulamalar «Baýyrmaldyq – ıman keltirgenderdiń ózara súıispenshiligi men din nasıhatynda ortaq bolýy» degen eken. Endeshe, musylman qaýymyn bereke-birlikke bastaıtyn Túrkitildes memleketterdiń bas múftıleriniń alqasy baýyrmashyldyq baılanystarymyzdy jandandyra túsedi degen senimdemin.
Barshańyzdy memleketterimizdiń yntymaqtastyǵyn arttyryp, asyl dinimizdiń aıbynyn asyrý úshin birlesip qyzmet etýge shaqyramyn. Barlyq bastamalar men usynystardy baýyrlas eldermen birlese júzege asyrýǵa qashan da daıynbyz. Búgingi basqosý tamyry bir, tarıhy ortaq elderdiń aýyzbirshiligin arttyra túsedi degen oıdamyn. Birligimiz bekem bolsyn!» dedi Naýryzbaı qajy Taǵanuly.
Aıta ketsek, Stambulda ótken halyqaralyq konferentsııaǵa Túrki memleketteri uıymyna múshe elderdiń dinı basqarmalarynyń tóraǵalary qatysyp, memleketter men dinı basqarmalar arasyndaǵy yntymaqtastyqty nyǵaıtý máselelerin talqylady.
