QMDB tóraǵasy men Mysyr elshisi ımamdarǵa sertıfıkat tabystady (FOTO)
Búgin elordada Qazaqstan musylmandary dinı basqarmasynyń tóraǵasy Naýryzbaı qajy Taǵanuly men Mysyr Arab Respýblıkasynyń Qazaqstandaǵy Tótenshe jáne Ókiletti Elshisi Manal Ehııa ál-Shınnaýı hanym ımamdarǵa sertıfıkat tabystady.
Saltanatty is-sharada Bas múftı Naýryzbaı qajy Taǵanuly: «Qazaqstan jáne Mysyr Arab Respýblıkasy arasynda baǵzy zamannan qalyptasqan tarıhı baılanys bar. Allaǵa shúkir, ǵasyrlar boıy qalyptasqan tarıhı baılanysymyz táýelsizdik alǵan jyldardan bastap qaıta jańǵyrdy. Búginde Mysyrdyń Ýaqyp mınıstrligimen, ál-Azhar ýnıversıtetimen, Pátýa berý ortalyǵymen áriptestik baılanysymyz nyǵaıyp keledi. Mysyrǵa barǵan saparymda Qazaqstanǵa bólinetin bilim grantyn eki esege ulǵaıtý týraly usynys aıttym. Ál-Azhar ýnıversıteti bul usynysymdy qabyl alyp, qoldaý bildirdi. Bul elimizdegi barsha din qyzmetkerleri úshin úlken tarıhı jańalyq boldy», – dep atap ótti.
Aıta ketsek, Qazaqstan musylmandary dinı basqarmasy men Mysyr Arab Respýblıkasynyń ál-Azhar ýnıversıteti arasyndaǵy ekijaqty kelisimge sáıkes, qazaqstandyq ımamdar úshin 2 aılyq onlaın-kýrs uıymdastyrylǵan bolatyn. Onlaın kýrsta bilimin shyńdaǵan 14 ımam Mysyr elshisiniń qolynan sertıfıkat aldy.
