QMDB tóraǵasy Mysyr elshisimen birqatar máseleni talqylady (FOTO)
Búgin elordada Qazaqstan musylmandary dinı basqarmasynyń tóraǵasy Naýryzbaı qajy Taǵanuly Egıpet Arab Respýblıkasynyń Qazaqstandaǵy Tótenshe jáne Ókiletti Elshisi Manal Ehııa ál-Shınnaýı hanymmen kezdesti.
Kezdesýde dinı oqý-aǵartý salasyn damytýǵa qatysty birqatar másele talqylandy. Atap aıtqanda, Qazaqstan men Egıpet Arab Respýblıkasynyń birlesip salǵan Nur-Múbárak ýnıversıtetiniń dinı kadr daıarlaý baǵytyndaǵy jumysyn jandandyrý, Mysyrda oqyp jatqan qazaqstandyq stýdentterdi jan-jaqty qoldaý, Qazaqstan musylmandary dinı basqarmasy men ál-Ázhar ýnıversıteti arasyndaǵy áriptestik baılanysty arttyrý, ımamdardy sol ýnıversıtetke qysqa merzimdi kýrstarǵa jiberý, Mysyr múftııatymen tájirıbe almasý jumystaryn jalǵastyrý t.b. máseleler sóz boldy.
«Qazaqstan men Egıpet Arab Respýblıkasy arasynda baǵzy zamannan qalyptasqan tarıhı-mádenı baılanys bar. Búginde áıgili ál-Ázhar ýnıversıtetin bitirgen ǵalymdarymyz dinı salada qyzmet etýde. Biz ımamdarymyzdyń ál-Ázhar ýnıversıtetinde bilimin shyńdaýǵa barynsha qoldaý kórsetýimiz kerek. Sonymen qatar, Kaırde oqyp jatqan qazaqstandyq stýdenttermen júıeli túrde baılanys ornatý maqsatynda arnaıy ókildigimizdi ashý oıymyz bar. Elshilik tarapynan osyndaı ıgi bastamalarymyzǵa qoldaý kórsetiledi degen senimdemiz» dep atap ótti Bas múftı Naýryzbaı qajy Taǵanuly.
Ókiletti elshi óz kezeginde elshilik tarapynan barynsha qoldaý kórsetiletinin jetkizip, senim bildirdi. Kezdesý sońynda Bas múftı mártebeli meımanǵa qurmet kórsetip, kádesyı usyndy.
