QMDB tóraǵasy «QMDB HALAL» ónimder jármeńkesine qatysty (FOTO)
Búgin Qazaqstan musylmandary dinı basqarmasynyń Tóraǵasy Naýryzbaı qajy Taǵanuly Almaty qalasynda ótip jatqan «QMDB HALAL» ónimder jármeńkesine qatysty.
Jármeńkeniń ashylý saltanatynda Bas múftı Naýryzbaı qajy Taǵanuly: «Alla Taǵala Quranda adal as iship, adal tabys tabýdy buıyrǵan. Islam dinin ustanǵan bizdiń ata-babalarymyz astyń adaldyǵyna mán bergen. Biz babalar jolyn jalǵastyrý maqsatynda QMDB janynan halal ónimderdi standarttaıtyn arnaıy ortalyq ashyp, adal asty halyqqa nasıhattap kelemiz. Halal degen uǵym tek asqa qatysty qabyldanbaýy tıis. Halal uǵymy ómirimizdiń basty tiregine aınalýy kerek» dep atap ótti.
Almaty qalasy Ortalyq meshiti aýlasynda uıymdastyrylǵan jármeńkede QMDB «Halal Damý» JShS-nen ótken 50 kásiporyn ózderiniń ónimderin halyqqa usyndy.
Jármeńkede Almaty, Jambyl oblystarynyń, Almaty qalasynyń kásiporyndary sút, et, shujyq, balyq, muzdatylǵan jartylaı daıyn ónimderin kórmege qoıdy.
Bas múftı otandyq eń úzdik halal kásiporyndaryn alǵys hatpen marapattap, izgi nıetin jetkizdi. Sonymen qatar «Halal Damý» JShS qyzmetkerlerin merekelik medalmen marapattady.
