QMDB tóraǵasy stýdentterge dáris oqydy (FOTO)

Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Túrkistandaǵy jumys sapary aıasynda Q.A.Iasaýı atyndaǵy ýnıversıtet stýdentterine dáris oqydy.

Bas múftı eń aldymen QMDB-nyń qazirgi tańda atqaryp jatqan jeti jumys baǵytyna erekshe toqtaldy. Onyń ishinde Ihsan iliminiń orny aıryqsha ekenin atap ótti.

«Biz babalarymyzdan jalǵasyp kele jatqan Ihsan ilimin nasıhattaýǵa den qoıyp otyrmyz. Bul – dinimizdegi úsh tuǵyrdyń biri, Qoja Ahmet Iasaýı babamyz, Abaı, Shákárim atalarymyz ustanǵan jol. Biz sol ilimdi nasıhattaýdy bastadyq. Ihsannyń túp negizi – Allany kórip turǵandaı, qoryqqan kúıde qulshylyq etý. Taǵy bir máni – bireýdi renjitpeý, kórkem mámile jasaý. Sondyqtan osy sıpattarǵa saı bolý úshin áreket etýge tıispiz» dedi Naýryzbaı qajy Taǵanuly.

Sondaı-aq kezdesýge ýnıversıtet rektory Janar Temirbekova, vıtse-rektor Ashat Turǵanbaev, oqytýshylar quramy men stýdentter qatysty. Bilim ordasynyń basshysy Janar Amangeldiqyzy Bas múftıge rızashylyǵyn bildirip, jańadan ashylǵan Teologııa fakýltetin birigip kóterý, ortaq jobalardy birlese júzege asyrýǵa shaqyrdy. Al QMDB Tóraǵasy dintaný mamandyǵyn damytýǵa, kitaphana qoryna Dinı basqarmadan shyqqan kitaptardy berýge ýáde etti.

Dáris sońynda ýnıversıtet rektoryna jáne kitaphanaǵa «Ihsan – rýhanı tárbıe negizi» kitabyn syıǵa tartty.