QMDB tóraǵasy Syr elinde zııaly qaýym ókilderimen kezdesti (FOTO)
Bas múftı Naýryzbaı qajy Taǵanuly Syr eline jasaǵan jumys saparynda zııaly qaýym ókilderimen kezdesip, urpaq tárbıesi, ıhsan ilimin nasıhattaý týraly suhbattasty.
Oblystyq Á.Tájibaev atyndaǵy Qyzylorda oblystyq ámbebap ǵylymı kitaphanada ótken kezdesýge oblystyq ardagerler keńesiniń tóraǵasy Serik Ábishuly, Qorqyt Ata atyndaǵy Qyzylorda ýnıversıtetiniń professorlary – Qazybaı Qudaıbergenuly, Baımyrza Qojamberliuly, «Rýhanı jańǵyrý» ortalyǵynyń dırektory Ýálıhan Serikuly, belgili aıtysker aqyndar – Amanjol Áltaev pen Muhtar Nııazov qatysty.
Basqosý barysynda zııaly qaýym ókilderi Bas múftı bastamasymen shyqqan «Ihsan – rýhanı tárbıe negizi» atty kitapty qoǵamǵa, ásirese jastarǵa nasıhattaýdyń mańyzyn aıryqsha atap ótip, atalǵan eńbekte qazirgi poblemalarǵa jaýap beretin taqyryptar qamtylǵanyn tilge tıek etti.
«Ihsan – baǵzy zamannan musylmandyq joldy ustanǵan qazaq halqynyń dinı túsinigine etene jaqyn ilim. «Ihsan» sózi shynaıylyq degen maǵynany bildiredi. «Ihsan» degenimiz – Allany kórip turǵandaı qorqynyshpen, shynaıylyqpen, jaýapkershilikpen qulshylyq etý. «Ihsan» ilimi musylman balasyn ár iste, ár qulshylyqta shynaıy bolýǵa tárbıeleıdi. Asylynda, Alla Taǵala barsha adamnyń ár isin, sózin, nıetin, tipti kókeıdegi oıyn biledi. Shynaıylyq bolmaǵan amalda bereke bolmaıdy», – dedi Bas múftı Naýryzbaı qajy Taǵanuly.
Kezdesý sońynda «Ihsan – rýhanı tárbıe negizi» kitabynyń tusaýkeser rásimi ótti. Bas múftı kitapqa qoltańbasyn jazyp, zııaly qaýym ókilderine syıǵa tartty.
