QMDB tóraǵasy Túrkııa elshisiniń keńesshisin qabyldady (FOTO)
Elordada Bas múftı Naýryzbaı qajy Taǵanuly jaqynda ǵana taǵaıyndalǵan Túrkııa Respýblıkasynyń Qazaqstandaǵy elshisiniń Din máseleleri jónindegi keńesshisi doktor Neshet Býdýr myrzamen kezdesti.
Kezdesýde eki eldiń arasyndaǵy tereń baılanys, din máseleleri jónindegi ózara tájirıbe almasý, dinı oqý oryndaryndaǵy shákirtterdiń jaı-kúıi, birlesip kitap shyǵarý men ortaq jobalar sóz boldy.
«Qazaqstanǵa, atajurtqa qosh keldińiz! Túrkııa Din isteri basqarmasymen jaqyn baılanystamyz. Ekijaqty máselelerge elshilik te qoldaý kórsetip otyrady. Túrkııaǵa arnaıy resmı saparymyz bolýy kerek edi, degenmen pandemııaǵa baılanysty ony keıinge qaldyrdyq. Qazirgi ýaqytta Sizdermen birigip kitap shyǵarý, aýdarma isinde ortaq jobalarymyz bar. Bizdiń kóptegen shákirtter Túrkııanyń dinı oqý oryndarynda bilim alyp jatyr. Tájirıbe almasý baǵyty boıynsha da birlese jumys istep kelemiz. Jańadan kelgen qyzmetińizge tabys tileımin» dedi Bas múftı.
Óz kezeginde Neshet Býdýr Bas múftıge jyly qabyldap, kórsetken iltıpaty úshin alǵysyn bildirdi.
«Shette emes, atajurtqa kelgenimdi sezinip jatyrmyn. Eki eldiń arasyndaǵy dostyq qarym-qatynas, mádenı, rýhanı baılanystardy arttyrý jaǵyna kúsh salamyn. Bul topyraqtan Islam dinin órkendetý jolynda ál-Farabı, Qoja Ahmet Iasaýı syndy ǵulamalar shyqty. Sizge Anadolydan Din isteri basqarmasynyń basshysy doktor Alı Erbash bastaǵan ujym ystyq sálemin joldady. Osy salada birlese jumys istep, kóptegen jobalardy júzege asyrýǵa qoldaý kórsetýge daıynbyz» dep atap ótti Neshet myrza.
Kezdesýde taraptar buǵan deıin bastalǵan baılanysty nyǵaıtyp, ortaq jobalardyń jalǵasatynyna senim bildirdi.
Bas múftı jýyrda ǵana jumysqa kirisken keńesshiniń aldaǵy isterine sáttilik tilep, dástúrge saı qonaqkáde syıǵa tartty.
