QMDB UJYMY ÁZ-NAÝRYZ MEREKESIN ATAP ÓTTI
Qazaqstan musylmandary dinı basqarmasy elordada din men ulttyq dástúr úndestigin nasıhattaýǵa arnalǵan «Áz-Naýryz – yrys pen birlik merekesi» atty aýqymdy rýhanı-mádenı shara ótkizdi.
Qazaqstan halqynyń birligi kúnimen tuspa-tus uıymdastyrylǵan merekelik basqosýǵa QMDB Tóraǵasy, Bas múftı Naýryzbaı qajy Taǵanuly, sondaı-aq Qazaqstan Respýblıkasy Parlamenti Senaty men Májilisiniń depýtattary, zııaly qaýym, kórshiles memleketterdiń elshileri, din qyzmetkerleri jáne konfessııa ókilderi qatysty.
«Qazaqstan musylmandary dinı basqarmasy dinı merekelermen qosa ulttyq meıramdardy da laıyqty dárejede atap ótýge nazar aýdaryp keledi. Óıtkeni halqymyz keń kólemde atap ótetin Naýryz merekesiniń tárbıelik máni úlken. Ulttyq meıramda aq dastarqan basynda úlkender batasyn berip, birin-biri kópten kórmegen týystar máre-sáre bolyp, al renjiskender keshirim jolyn ustanyp, izgilikti isterimen urpaqqa ónege kórsetedi.
Bul kúnde qorshaǵan ortany tazalaý, aǵash egý, bulaqtyń kózin ashý syndy saýapty hám salaýatty amaldar júzege asady. Mundaı ónegeli iske óskeleń urpaqty jumyldyrýdyń mańyzy úlken. Naýryz – barsha adamzatty birlikke, ıgilikke, meıirimdilikke úndeıtin mereke»,-dedi Bas múftı.
Sondaı-aq, merekelik sharada arnaıy quttyqtap Qyrǵyz Respýblıkasynyń Qazaqstan Respýblıkasyndaǵy Elshisi Qudaıbergen Bazarbaev, QR Májilisiniń depýtaty Murat Ábenov, Din ister komıtetiniń tóraǵa orynbasary Maqsat Ramanqulov pen konfessııa ókilderi sóz sóıledi.
Is-shara barysynda arnaıy qurylǵan kıiz úılerde qazaq halqynyń salt-dástúrleri men qonaq kútý mádenıeti tanystyrylyp, kelgen meımandarǵa ulttyq taǵamdar usynyldy.
Merekelik jıynnyń basty maqsaty – el ishindegi tatýlyq pen ózara qurmetti nyǵaıtý, Naýryz merekesiniń rýhanı ári mádenı qundylyǵyn keńinen dáripteý, sondaı-aq din men dástúr sabaqtastyǵyn keıingi urpaqqa nasıhattaý boldy.
