Quran jarysyna daıyndyq jumystary pysyqtaldy (FOTO)
Elordada QMDB Apparat basshysy Ǵylymbek Jádigerulynyń jetekshiligimen Quran Kárimdi jatqa jáne mánerlep oqýdan H respýblıkalyq jarystyń daıyndyq jumystary pysyqtaldy.
Eń aldymen Ǵylymbek Jádigeruly bıylǵy jarystyń jóni bólek ekenine toqtaldy.
«Ózderińiz bilesizder, sońǵy on jylda dástúrge aınalǵan respýblıkalyq saıys bıyl rýhanı astanamyz Túrkistanda ótedi. Biz qazirden daıyndyqty bastap kettik. Allanyń qasıetti Quranyn dáriptep, qarılardyń barynsha uqypty daıyndalýyna jaǵdaı jasaýymyz kerek. Bul rette oblystyq ókildikter de osy jarysqa qatysatyn qarılardyń saıysyn aıaqtady. Búgingi jıynymyzda Táýelsizdigimizdiń 30 jyldyǵyna arnalyp otyrǵan jarysty uıymdastyrý jumystaryn retke keltirip, ózimizge tıesili mindetterdi uqypty atqaryp shyǵýdy suraımyn», – dedi Apparat basshysy.
Jıyn barysynda H Respýblıkalyq Quran saıysyna jaýapty etip Ýaǵyz-nasıhat bóliminiń meńgerýshisi Batyrjan Berdenuly pen Qajylyq bóliminiń meńgerýshisi Jándillá Mamythanuly bekitildi. Sondaı-aq saıys kezinde aqparattyq qoldaý, televızııalyq túsirilim jasaýdy qolǵa alý, dızaınerlik jáne nasıhat jumystary Aqparat jáne qoǵammen baılanys bólimine tapsyryldy. Qazirgi ýaqytta respýblıkalyq jarystyń jumys toby qurylyp, jaýapty mamandarǵa mindet júkteldi.
Eske sala keteıik, bıylǵy Quran jarysy el Táýelsizdiginiń 30 jyldyq mereıtoıyna oraı qazan aıynyń 6-7 kúnderi Túrkistan qalasynda ótedi. Saıys Quran Kárimniń 30, 20, 10 parasyn jatqa oqý jáne mánerlep oqý nomınatsııalary boıynsha uıymdastyrylady.
