Qurban aıtqa oraı QMDB Tóralqa otyrysy ótti (FOTO)
Elordada Bas múftı Naýryzbaı qajy Taǵanulynyń tóraǵalyǵymen Qurban aıt merekesine oraı QMDB qyzmetkerleri men ımamdardyń jıyny ótti.
Tóralqa otyrysynda kún tártibindegi birqatar máseleler, atap aıtqanda, karantın jaǵdaıyndaǵy Qurban aıt merekesine daıyndyq, qurban malynyń baǵasy, dinı rásimdi onlaın jáne oflaın formatta ótkizý, aqparat salasynyń jumysy men meshitterge ataý berý syndy máseleler qaraldy.
«Alla qalasa bir aptadan soń qasıetti Qurban aıt merekesi kele jatyr. Bul kúnderi Dinı basqarma Ortalyq apparattan bastap, elimizdiń túkpir-túkpirindegi meshit ımamdaryna deıin atsalysýy tıis. Daıyndyǵymyzdy ózara pysyqtap, túıtkildi máselelerdi sheship alýdy jón sanap otyrmyz.
Byltyr ókil arqyly qashyqtan qurban shalýdy qolǵa alyp, dinı rásimdi onlaın formatta atqarýǵa májbúr bolsaq ta, merekeni abyroımen ótkizdik degen oıdamyn. Bul ıgi isimizge, úlken qaıyrymdylyq jobasyna Memleket basshysy Qasym-Jomart Toqaev ta rızashylyǵyn bildirgen-di. Tapsyrys berýshilerden de, muqtaj jandardan da shaǵym bolǵan joq. Bıyl da osy isti joǵary deńgeıde jergilikti ákimdik, eriktiler jáne meshit jamaǵatymen birge tap-tuınaqtaı etip atqaryp shyqsaq deımin.
Qazirgi tańda bizdiń tarapymyzdan qurban shalýǵa baılanysty eki joldy usynyp otyrmyz. Onyń birinshisi memlekettik sanıtarlyq-Epıdemıologııalyq qadaǵalaý organdary tarapynan ruqsat berilgen jergilikti qasaphanalarda sanıtarlyq erejelerdi qatań saqtaı otyryp qurban shalý rásimin oflaın rejımde, ıaǵnı dástúrli jolmen uıymdastyrý», – dep atap ótti Bas múftı.
Budan keıin birer aı buryn Qurban aıtqa oraı qurylǵan arnaıy toptyń atqarǵan jumystarymen QMDB Apparat basshysy Ǵylymbek Májıev tanystyryp shyqty.
«Búgingi pandemııa jaǵdaıynda qurban shalýshyǵa qolaıly jaǵdaı jasaý jáne kómekke muqtaj jandardy qoldaý maqsatynda ótken jyldyń tájirıbesin qoldanyp, qurban shalý rásimin sharıǵattaǵy «ókildik» qaǵıdasyna sáıkes www.qurban2021.kz saıty arqyly onlaın rejımde júzege asyrýdy qolǵa almaqpyz. Alla qalasa búgin-erteń onlaın tapsyrys qabyldaıtyn saıt iske qosylmaq. Odan bólek jýyrda ǵana elordadaǵy qurban shalý rásimi ótetin iri saýda oryndaryna arnaıy baryp, mal baǵasyn naqtyladyq. Saýdagerler men qasapshylarǵa qurban shalýdyń sharıǵattaǵy mańyzy men durys júzege asyrý joldary túsindirildi», – dedi Ǵylymbek Jádigeruly.
Osy oraıda «Zeket jáne qaıyrymdylyq» qorynyń dırektory Talǵat Omarov ókildikterdegi jaýapty mamandar bergen málimetterge súıene otyryp, óńirlerdegi tórt-túlik qunynyń qansha ekenin baıandap berdi. Sharıǵat jáne pátýa bólimi meńgerýshisiniń orynbasary Hasan Amanqul qurban aıt kezindegi din rásimderdiń sharıǵatqa saı bolýy mańyzdy ekenin basa aıtty.
«Byltyr pandemııa jaǵdaıyna baılanysty aıt namazy oqylmady. Qurban shalýdy ádette sharıǵatqa saı aıt namazynan keıin bastaıtyndyqtan 2020 jyly namaz oqylmaı, ýaqytyna kelgende túrli pikir týyndady. Bireýler kún kóterilgende dese, endi bireýler kún shyqqanda, endi bireýler besin ýaqytynan bastap qurban shalýǵa ruqsat degen pikirde boldy. Bıyl da aıt namazynyń oqylyp-oqylmaıtyny belgisiz. Ony jaqyndaǵanda bile jatarmyz. Áıtse de, oqylmaı qalǵan jaǵdaıda elimizdiń barlyq óńirinde kún shyqqannan keın bir saǵat ótisimen qurban shalýdy bastap ketý kerek», – dedi Hasan Tashaıuly.
Sondaı-aq Aqparat jáne qoǵammen baılanys bóliminiń meńgerýshisi Marat Bektazınov ulyq merekeniń baspasóz betterindegi nasıhaty men qurban aıtqa qatysty suraq-jaýaptar men túsindirme jumystary jóninde aıtyp ótti.
Al Meshit isteri bóliminiń meńgerýshisi Marat Jappasbaev ókildikter usynǵan 6 meshitke qazaq qoǵamyna, dinge qyzmet etken abzal jandardyń atyn berý jóninde usynysty Tóralqa talqysyna saldy. Olardyń qatarynda Shymkent qalasynyń «Dostyq» shaǵyn aýdanynda elimizge jáne Orta Azııaǵa tanymal ǵalym Ábdisáttar Shákirulynyń esimi berilgen meshit te bar.
Tóralqa sońynda birqatar máseleler talqylanyp, qurban aıtqa deıin solardy sheshý tapsyryldy. Bas múftı Naýryzbaı qajy Taǵanuly Qurban aıtqa baılanysty qurylǵan jumys toby men ókildikterdiń bas ımamdaryna, barsha din qyzmetkerine tıisti tapsyrmalar berdi.
