Qyzylordada «Halyq arna» fılıaly ashyldy (FOTO)
QMDB Tóraǵasy, Bas múftı Naýryzbaı qajy Taǵanuly Syr óńirine jasaǵan saparynda Dinı basqarmanyń «HALYQ ARNA» telearnasynyń jańa fılıaly «TANYMMEDIA» stýdııasynyń ashylý rásimine qatysty.
Bas múftı men qoǵam qaıratkeri, belgili jýrnalıst Erjan Ýaıis jańa stýdııamen tanysyp, izgi tilekterin bildirdi.
«Allaǵa shúkir byltyr «HALYQ ARNA» atty tól telarnamyz ashyldy. Bul múftııattyń 30 jyldyǵyna úlken tartý boldy. Arnanyń damýyna úles qosaıyq degen nıetpen óńirlerdegi ımamdarymyz shama-sharqynsha stýdııa ashyp jatyr. Atyraýda, kúni keshe Semeıde stýdııa ashyldy. Endi muny barynsha paıdalaný kerek. Medıany ıgeretin ýaqyt keldi. Qazirgi ýaqyt – aqparattyń zamany. Mine, myqty ımamdar otyr. RANT múshesi Dastan Qurmanbaevtyń ýaǵyzdary jıi shyǵyp júr. Bas ımamdardyń keıde ýaǵyzǵa ýaqyty bolmaýy múmkin, biraq meılinshe shyǵý kerek. Jergilikti halyqqa psıhologııalyq keńes, dinı aqparat, ýaǵyz-nasıhat beretin ózderińiz. Jańa stýdııanyń tanym kókjıegi keń bolsyn! Tanymdyq materıaldar mol bolsyn!» dedi Bas múftı.
«TANYMMEDIA» stýdııasynyń ashylýyna QMDB Apparat basshysy Ǵylymbek Jádigeruly, Aqparat jáne qoǵammen baılanys bóliminiń meńgerýshisi Marat Dálelhanuly, Qyzylorda oblystyq din isteri basqarmasynyń basshysy Qýanysh Qýantqanuly men Syr óńiriniń bas ımamy Bolatbek Ulasqanulynyń qatysqanyn aıta ketken jón.
