RAMAZAN QUTTY BOLSYN! (VIDEO)
Asa qamqor erekshe meıirimdi Allanyń atymen bastaımyn! Barlyq maqtaý Allaǵa tán. Ardaqty Paıǵambarymyz Muhammedke Allanyń salaýaty men sálemi bolsyn!
Qurmetti qaýym!
Barshańyzdy on eki aıdyń sultany, qasıetti Ramazannyń bastalaýymen shyn júrekten quttyqtaımyn! Otbasylaryńyzǵa baq pen bereke tileımin!
Jaratýshy Jabbar Iemiz árbir izgi amaldyń saýaby eselenip jazylatyn berekeli aıda ustaǵan orazamyzdy, jasaǵan duǵamyzdy, oqyǵan namazymyzdy, oryndy sebeptermen aýyz bekite almaı qalǵan jandardyń bergen sadaqalaryn qabyl etkeı!
Ramazanda aýyz bekitken ısi musylman balasy ózin iship-jeýden ǵana shektemeı, jany men tánin jamandyqtan saqtap, izgilikke umtylady. Is-áreketin musylmanǵa tán ádep aıasynda oryndaýǵa tyrysady. Óıtkeni, Ramazan – kez kelgen izgi amaldy rııasyz nıetpen jasaýǵa tárbıeleıtin, adamdy taqýalyqqa úıretetin aı. Ashtyq pen shólge tózip, Alla razylyǵyn alýdy shynaıy nıet etken adamǵa beriletin syı men qurmet erekshe bolmaq.
Alla Taǵala Qudsı-hadıste: «Aýzy berik adam iship-jeýin Men úshin doǵardy. Oraza – Men jáne qulymnyń arasyndaǵy ǵıbadat. Oǵan beriletin syıdy Men ǵana ólshep, Men beremin. Aýzy berik qulymnyń ashtyq pen shóldeý sebebinen shyqqan aýyz ıisi Men úshin mısk átirinen de qaıyrly», – degen.
Qadirli jamaǵat!
Búginde Qazaqstan musylmandary dinı basqarmasy «Ihsan ilimin» keńinen nasıhattap keledi. Ihsan – pendeniń ımanyn bekemdep, qulshylyqqa degen qulshynysyn arttyratyn, adamgershilikke tán ıgi qasıetterdi kemeldendire túsetin, ár amaldy kórkem túrde oryndaýǵa úıretetin rýhanı ilim. Osy rette rýhanı kemeldený aıy – Ramazanda barynsha ádepsiz áreket pen qate-kemshilikten arylyp, tulaboıymyzda kórkem minez qundylyqtaryn qalyptastyrýǵa tyrysqanymyz abzal.
Alla Taǵala jer betinen juqpaly indetti joıyp, adamzatty qaýip-qaterden aman etkeı. Ámın!
Naýryzbaı qajy TAǴANULY,
Qazaqstan musylmandary dinı
basqarmasynyń tóraǵasy, Bas múftı
