Rátbek qajy Nysanbaıuly kitabynyń tusaýkeseri ótti (FOTO)
QMDB Tóraǵasy, Bas múftı Naýryzbaı qajy Taǵanulynyń qatysýymen Almatydaǵy Nur-Múbarak ýnıversıtetinde Dinı basqarmanyń tuńǵysh tóraǵasy Rátbek qajy Nysanbaıulynyń «Paıǵambarlar tarıhy» kitabynyń tusaýkeseri ótti.
Tusaýkeser rásimine Nur-Múbarak ýnıversıtetiniń basshylary men qyzmetkerleri, Almaty oblystyq jáne Almaty qalalyq din isteri basqarmasynyń ókilderi, QMDB qyzmetkerleri qatysty. Qasıetti Quranmen bastalǵan sharanyń izgi tilekter legin QMDB Tóraǵasy Naýryzbaı qajy Taǵanuly bastady.
«Biz úlkendi syılap, qurmettegen halyqpyz. Sonaý Keńes dáýirinde qazılyq qyzmet atqaryp, Qazaqstan musylmandary dinı basqarmasyn qurǵan qazaqtyń tuńǵysh múftıi, ustazymyz Ratbek qajy Nysanbaıulynyń «Paıǵambarlar tarıhy» kitaby – talaı jylǵy naǵyz qundy eńbek. Qıyn-qystaý kezeńde qanshama shákirt tárbıelep, naǵyz ultjandylyq tanytyp, dinimizge sińirgen eńbegińiz úshin sizge alǵysymyz zor» dedi Bas múftı.
Nur-Múbarak ýnıversıtetiniń rektory, professor Mýhammad ásh-Shahhat ál-Jındı Rátbek qajy Nysanbaıulynyń eńbekterimen tanysa kele: «Keńes dáýirinde QMDB quryp, Nur-Múbarak ýnıversıtetiniń negizin qalaýǵa, alǵashqy medrese ashý sekildi dinge sińirgen eńbekterińizge qarap esimińizdi «Fatıh» (Ashýshy) dep ataǵym keledi» degen júrekjardy lebizin bildirdi. Sondaı-aq Almaty oblystyq Din isteri basqarmasynyń bólim basshysy Baýyrjan Nıet, Almaty qalalyq Din isteri basqarmasynyń basshysy Nurlan Qıqymov quttyqtaýyn jetkizdi.
Rátbek aqsaqalǵa júrekjardy tilegi men alǵysyn jaýdyrǵan jandar az bolmady. Ótken tarıhqa sholý jasap, elimizdiń eldigi jolynda dinı ustanymnyń beriktigine qatysty basty qaǵıdalarymen bólisken Rátbek qajy aqsaqalǵa Nur-Múbarak ýnıversıteti shapan jaýyp, syı káde jasady.
