«Qamqor-Sharapat» salttyq qyzmet kórsetý ortalyǵy jumysyn bastady (FOTO)
Búgin Qazaqstan musylmandary dinı basqarmasyna qarasty «QAMQOR-SHARAPAT» salttyq qyzmet kórsetý ortalyǵy resmı túrde jumysyn bastady.
«QAMQOR-SHARAPAT» – kópshiliktiń suranysymen jerleý rásimderinde ysyrapshyldyq pen básekelestikke jol bermeý jáne jalpyǵa ortaq mádenıet qalyptastyrý maqsatynda qolǵa alynǵan joba. Búgin Dinı basqarma bekitken úlgige saı Nur-Sultan qalasynan ortalyǵy ashyldy. Is-sharaǵa QMDB tóraǵasynyń orynbasary, naıb múftı Ershat qajy Aǵybaıuly, «QAMQOR-SHARAPAT» salttyq qyzmet kórsetý ortalyǵynyń dırektory Kamaljan Turdybaev, sondaı-aq, Nur-Sultan qalasy ókildigi men respýblıkalyq «Áziret Sultan» meshitiniń bas ımamy Erbolat Júsip jáne «Aqmeshit» meshitiniń bas ımamy Dáýren Mýslımov qatysty.
«QMDB tóraǵasy, Bas múftı Naýryzbaı qajy Taǵanuly Haziret atqarýshy bılik ókilderine qabir basyndaǵy báseke retinde mazar salyp jarysýdy toqtatyp, ysyrapqa jol bermeý úshin zıratty birizdilikke keltirý jóninde usynys kótergen bolatyn. Búginde jerleý rásimderi sharıǵat normalaryna jáne ata-baba dástúrine saı bolýymen birge, órkenıet kóshinen de artta qalmaýy kerek. Aldaǵy ýaqytta salttyq qyzmet kórsetetin ortalyqtar QMDB usynǵan úlgige saı jumys júrgizse qabir basyndaǵy keleńsizdikter toqtap, birizdilikke keledi degen nıettemiz» deıdi naıb múftı Ershat qajy Aǵybaıuly.
