Shymkentte «Halal expo-2021» halyqaralyq kórmesi bastaldy (FOTO)
Búgin Shymkent qalasynda Bas múftıdiń bastamasy QMDB «Halal Damý» mekemesiniń uıymdastyrýymen «Halal EXPO-2021» kórmesi bastaldy. Is-sharaǵa QMDB Tóraǵasy, Bas múftı Naýryzbaı qajy Taǵanuly, naıb múftı Ershat Aǵybaıuly, Shymkent qalasy ákiminiń birinshi orynbasary Shyńǵys Muqan, «Halal Damý» dırektory Aıbek Asqarbekuly qatysty.
Alǵysóz alǵan Bas múftı halal ındýstrııasyn damytýǵa úles qosqan barsha kásiporynǵa alǵysyn bildirdi. «Halal EXPO-2021» halyqaralyq kórmesi elimizde, onyń ishinde Shymkent qalasynda tuńǵysh ret uıymdastyrylyp otyr. Qazaqstan musylmandary dinı basqarmasy 7 baǵytqa erekshe basymdyq beredi. Múftııat kóptegen sharıǵat sheńberindegi jumystardy nazardan tys qaldyrǵan emes. Sonyń biri de biregeıi – halal salasy.
Halal – barsha musylmandardyń kúndelikti tynys-tirshiligine qatysty is-áreketter. Bul tek Islam dinine tán uǵym. Bul jóninde Qasıetti Quranda: «Eı, ıman keltirgender! Biz rızyqtandyrǵan (adal) taǵamdardy jeńder. Alla Taǵalaǵa shúkir etińder. Oǵan ǵana qulshylyq etińder», – delingen. Adal astyń qulshylyq, tirshilikke tikeleı qatysy bar. Sondyqtan buǵan asa mán berý kerek» dedi Naýryzbaı qajy Taǵanuly. Sondaı-aq Bas múftı úzdik taýar óndirýshiler men belsendi jumys atqarǵan jergilikti baqylaýshy-ınspektorlardy arnaıy marapattady.
Kórme barysynda Bas múftı bastaǵan delegatsııa jármeńkeni tolyq aralap shyqty. Kórmege 50-den astam otandyq kásiporynnyń ónimderi qoıylǵan. Sonymen qatar Reseı, Ózbekstan, Qyrǵyz eliniń de kásipkerleri óz taýarlaryn ákelgen.
Aıta keteıik, halyqaralyq kórme eki kúnge jalǵasady.
