Stýdentke bas múftı granty berildi (FOTO)
Bas múftı Naýryzbaı qajy Taǵanuly Shyǵys Qazaqstan oblysyna jasaǵan resmı sapary barysynda Tarbaǵataı aýdany Aqjar eldimekeninde boı kótergen qaıyrymdylyq mekemesiniń ashylý rásiminde atalǵan aýyldyń azamaty, búginde Almatydaǵy Nur-Múbarak ýnıversıtetinde tálim alyp jatqan Rınat Nazarbekovke bilim grantyn tabystady.
«Biz ótken jyly Qazaqstan musylmandary dinı basqarmasynyń 30 jyldyq mereıtoıyna oraı otyzdan astam stýdentke bilim grantyn tabystadyq. Osy bastamanyń jalǵasy retinde Aqjar aýylynyń turǵyny, shákirtimiz Rınat Nazarbekovke bilim grantyn berip otyrmyz. Oqýda ozat bolǵan shákirtterdi, sonymen qatar otbasylyq jaǵdaıǵa baılanysty oqý aqysyn tóleı almaǵan shákirtterdi qoldaý – basty jumystarymyzdyń biri bolyp qala beredi. Alla Taǵala alǵan bilimińdi elimiz ben jerimizdiń ıgiligi jolynda jumsaýyńa tilektespin» dedi Bas múftı Naýryzbaı qajy Taǵanuly.
Igi is-sharaǵa qatysqan Tarbaǵataı aýdanynyń ákimi Ashat Saıdahmetuly quttyqtaý lebizin bildirdi.
