Tarıhı meshitte jumys keńsesi ashyldy (FOTO)
Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly Syr óńirine jasaǵan resmı saparynda Qyzylorda qalalyq «Aıtbaı» meshitinde jumys keńsesiniń ashylý rásimine qatysty.
Saltanatty is-sharada Bas múftı ǵımarattyń negizgi jumysymen tanysyp, din jolynda qyzmet etýshi ımamdarǵa qutty-berekeli oshaqqa aınalýyn tiledi.
«Aıtbaı» meshitiniń shahar turǵyndarynyń rýhanı ordasyna aınalǵanyna ǵasyrdan asty. Tipti qanshama jyldar boıy Qyzylorda oblysynyń ortalyq meshiti boldy. Degenmen mundaı kóne ári tarıhı meshitte jumys isteýdiń orny bir bólek. Jamaǵat bir jaǵynan kóneniń kózin izdep keledi, ekinshi jaǵynan qulshylyǵyn jasaıdy. Qazirgi jańa meshitterde arnaıy keńse, bas ımam bólmesi qarastyrylǵan. Al mundaı eski ǵımaratta bul jaǵy qarastyrylmaǵan. Imamdardyń jumysyna ońtaıly bolýy úshin osyndaı bastama qolǵa alyndy Syr ımamdarynyń jumys isteýine qolaıly, ońynan bolsyn» dedi Naýryzbaı qajy Taǵanuly.
Sonymen qatar QMDB Apparat basshysy Ǵylymbek Jádigeruly, Aqparat jáne qoǵammen baılanys bóliminiń meńgerýshisi Marat Dálelhanuly, Qyzylorda oblysy ardagerler keńesiniń tóraǵasy Serik Ábishuly men oblystyq din isteri basqarmasynyń basshysy Qýanysh Qýantqanuly da tarıhı meshittiń ımamdaryna qutty bolsyn aıtyp, isterine bereke tiledi.
Aıta keteıik, tarıhı meshit janynan boı kótergen ǵımarat qurylysy 2020 jyly bastalyp, bıyl aıaqtalǵan bolatyn. Ofıste bas ımam men naıb ımamdarǵa arnalǵan jumys bólmeleri men keńse, shákirtterge arnalǵan dárishana, aýdarma jáne t.b. syndy 7 bólme bar. Jańa ǵımaratta meshitke kelýshi jamaǵatqa dinı dárister berilip, arab tilin jetik meńgergen mamandar aýdarma jumystarymen aınalysady.
