Tarıhı sát: Bes múftı suhbattasty (FOTO)
Qazaqstan musylmandary dinı basqarmasynyń 30 jyldyq mereıtoıy aıasynda múftııatty ár jyldary basqarǵan Rátbek qajy Nysanbaıuly, Ábsattar qajy Derbisáli, Erjan qajy Malǵajyuly, Serikbaı qajy Oraz, Bas múftı Naýryzbaı qajy Taǵanuly bir ústel basynda suhbattasyp, múftııattyń izgilik jolyndaǵy ıgi jumystaryn jandandyrý jaıly oılaryn ortaǵa saldy.
QMDB Tóraǵasy, Bas múftı Naýryzbaı qajy Taǵanuly QMDB-nyń 30 jyldyq meretoıyna baılanysty elordada ótken «Beıbitshilik pen rýhanı kelisimdi saqtaýdaǵy dinı ınstıtýttardyń róli» atty halyqaralyq konferentsııaǵa qatysyp, mazmundy baıandama jasaǵan múftılerge izgi tilegin bildirip, qurmetpen sóz usyndy.
Birinshi sóz alǵan ardager ustaz Rátbek qajy Nysanbaıuly bes múftıdiń bir ústel basynda pikir almasýyn tarıhı sátke balap, basqosýǵa sebepker bolǵan Naýryzbaı qajy Taǵanulyna aıryqsha alǵysyn jetkizdi.
Sóz tizginin alǵan Ábsattar qajy Derbisáli din, el qamynda qurban bolǵan tanymal tulǵalar týraly, din qaıratkerleri jaıly tarıhı tanymdyq kitaptar shyǵarýdy usyndy. Sonymen qatar múftııat tarıhy týraly zertteý jumystaryn bastaý qajettigin jetkizdi.
Erjan qajy Malǵajyuly óz sózinde mázhaby bir, tarıhy ortaq Ortalyq Azııa múftıleri keńesin quryp, dinı saladaǵy jumys kókjıegin keńeıtý týraly oıymen bólisti.
Serikbaı qajy Oraz Bas múftı Naýryzbaı qajy Taǵanulynyń Memleket basshysy Qasym-Jomart Toqaevtyń qabyldaýynda kótergen jamaǵat arasynda «Ihsan» ilimin, al jalpy halqymyzǵa Abaıdyń kemel adam kontseptsııasyn keńinen nasıhattaý, elimizde Islam akademııasyn qurý, Islam jáne teologııa kitaphanasyn salý, meshitterdiń arhıtektýrasyn qazaqy salt-sanaǵa saı qalyptastyrý týraly bastamalaryn qoldaıtynyn jáne osy baǵytta naqty sheshimder qabyldaý qajettigin alǵa tartty.
Basqosýdy qorytyndylaǵan Bas múftı Naýryzbaı qajy Taǵanuly: «30 jyl merzim ishinde elimizde 2714 meshit ashyldy. Dinı saladaǵy qyzmetker sany 4 myńnan asty. 9 medrese-kolledj ben 6 qarılar daıarlaý ortalyǵy ashyldy. «Nur Múbárak» ýnıversıteti men Islam ınstıtýtynyń jemisti eńbeginiń arqasynda kadr tapshylyǵy tolyq sheshildi. Osynaý tarıhı isterde sizderdiń súbeli úlesterińiz ben qoltańbalaryńyz jatyr. Áli de din qyzmetinde eńbek etip kelesizder. Alla Taǵala kúsh-qýat, yntymaq pen berekesin násip etsin» dep sózin túıindedi.
