Táýelsizdiktiń 30 jyldyq mereıtoıyna arnalǵan jumys jospary talqylandy (FOTO)
Elordada Bas múftı Naýryzbaı qajy Taǵanulynyń tóraǵalyǵymen Táýelsizdiktiń 30 jyldyq mereıtoıyna arnalǵan arnaıy jıyn ótti. Májiliske Aqparat jáne qoǵamdyq damý vıtse-mınıstri Marat Ázilhanov, naıb múftı Ershat qajy Aǵybaıuly, Apparat basshysy Ǵylymbek Jádigeruly, QMDB bólim meńgerýshileri qatysty.
Jıynda naıb múftı Ershat Ońǵarov Qazaqstan musylmandary dinı basqarmasynyń 2021 jyly atqaratyn jumys jospary men Táýelsizdiktiń 30 jyldyq mereıtoıyna arnalǵan is-sharalar týraly baıandap ótti. Sonymen qatar Aqparat jáne qoǵammen baılanys bóliminiń meńgerýshisi Marat Bektazınov, Dinı ońaltý bóliminiń meńgerýshisi Qanat Alshynbaev ótken jyly atqarylǵan jumystar jaıly baıandama jasap, bólim josparymen bólisti.
Jınalysta Bas múftı Naýryzbaı qajy Taǵanuly: «Biz kúndelikti ýaǵyz-nasıhat jumystarynda tárbıe máselesine basa mán berip otyrmyz. Osy baǵytta Ihsan ilimi, tolyq adam kontseptsııasy jaıly kitap jazdyq. Alla qalasa, jýyrda tusaýkeser rásimin jasaımyz», – dep atap ótti.
Májiliste sóz alǵan vıtse-mınıstr Marat Ázilhanov múftııattyń ıgi bastamalaryna, Táýelsizdiktiń 30 jyldyq mereıtoıyna arnalǵan izgi is-sharalaryna sáttilik tiledi.
Aıta ketsek, Qazaqstan musylmandary dinı basqarmasy 30 jyldyq mereıtoı qarsańynda 12 qaıyrymdylyq is-shara, 11 shyǵarmashylyq baıqaý, 10 forým men konferentsııa, 2 sporttyq saıys uıymdastyryp, 4 kitap shyǵarýdy josparlap otyr.
