Túrkistan: Ramazan kerýenine úles qosty (FOTO)
Elordadan bastaý alǵan «Ramazan kerýenine» Túrkistan oblystyq ókildigi men aýdandyq meshitter úles qosyp jatyr. «Zeket» qory ókildiginiń uıymdastyrýymen oblystyq meshit pen Qazyǵurt aýdany «Ysmaıyl ata» meshitinde 100 otbasyǵa kómek kórsetti. Al, Kentaý qalasynda 300, Tólebı aýdanynda 50 janǵa azyq-túlik, turmystyq kerek-jaraqtar úlestirildi.
Aýqymdy qaıyrymdylyq sharalary josparǵa saı, belgilengen keste boıynsha aýdandyq ortalyq meshitterdiń barlyǵynda júzege aspaq. Ramazan aıy bastalǵaly aýyldyq deńgeıdegi meshitterde de muqtaj otbasylarǵa úzdiksiz járdem berilip keledi. Oblys boıynsha myńnan astam adamǵa Ramazannyń rızyǵy jetkizildi.
Igi istiń basy-qasynda bolǵan naıb Múftı Alaý Ádilbaev demeýshilik etken kásipkerlermen suhbattasyp, Múftııat atynan alǵys bildirdi. Sondaı-aq, kómekke qoly jetken analardy Ramazan aıymen quttyqtady.
